Makan a la Pinoy: Coleslaw

Ni BRENDA S. DACPANO
www.nordis.net

Ti coleslaw ket ensalada a repolyo ken carrots a naiw-iwa iti napino. Malaokan daytoy iti dressing a mayonnaise, buttermilk wenno sour cream.

Coleslaw with mayonnaise dressing. Photo ni Brenda S. Dacpano

Ti coleslaw ket manipud iti Dutch a termino a koolsla wenno cabbage salad. Ti kool ket cabbage ken ti sla ket pinaababa a salade.

Maibagay daytoy kadagiti sandwich, tinuno a karne wenno ikan, wenno kanen a solo.

Uray aniaman ti usaren kadagiti tallo a tradisional a dressing a mayonnaise, buttermilk wenno sour cream; malaokan daytoy iti wine vinegar wenno cider vinegar (suka ti mansanas). Mabalin nga usaren ditoy ti suka ti niog ngem napigsa unay ti suka ti unas wenno sukang Iloko.

Nasaysayaat a maipalammiis pay iti refrigerator iti 30 minutos agingga maysa oras tapno maagsep dagiti nateng ti salad dressing. No agbayag a nakauper dagiti nateng iti dressing ket malpes ken saanen a nasarangsang.

Ramen:

1 medium repolyo
2 carrots
1 bassit a sibuyas (optional)

Dressing:

1 tasa mayonnaise
¼ tasa cider vinegar
1 kutsara asukar
½ -1 kutsarita asin
Sangapirit a paminta

Panangisagana:

1. Iw-iwaen iti naingpis ti repolyo, kasta met ti carrots. Mabalin met a gadgaden ti carrots.

2. Iti garapon, paglaoken amin a ramen ti dressing. Kulug-kulogen tapno aglaok amin a ramen ken arigna a nai-blender.

3. Ilaok ti dressing iti repolyo ken carrots. Kaluban ken ipalammiis iti uneg ti refrigerator iti agarup maysa oras. # nordis.net

Share

Leave a Reply