Makan a la Pinoy: Bread pudding

Ni BRENDA S. DACPANO
www.nordis.net

Ti bread pudding ti kalakaan nga aramiden a dessert wenno merienda a pakausaran dagiti daan wenno natangkenen a tinapay. Uray ania a tinapay ket mabalin ditoy basta la ketdi nasam-it, kas ti pan de bara, pan de lemon, pandesal, brioche wenno dadduma pay a yeast bread.

Cheese pandesal a mabalin nga aramiden a bread pudding. Photo ni Brenda S. Dacpano

Tapno ispesial, mabalin a laokan iti pasas, dates, prunes wenno dadduma pay a naipamaga a prutas, wenno laokan ti chocolate chips. Mabalin met a laokan ti spices kas ti cinnamon, nutmeg, vanilla wenno cardamom. Mayat met a parabawan iti fresh a prutas.

Ramen ti custard ti bread pudding:

8 itlog
3 tasa heavy cream wenno gatas
3 kutsara brown nga asukar
sangapirit nga asin
dried ken fresh fruits (optional)
chocolate chips (optional)

Panangisagana:

1. Ipapudot ti oven iti 350°F wenno 180°C.

2. Batilen dagiti itlog ken ilaok ti asukar. Batilen daytoy agingga marunaw ti asukar. Ikiwar ditoy ti heavy cream. Ikiwar metten ditoy dagiti spices, no agusar.

3. Lanitan iti butter ti baking tray nga aglaon iti 6-8 tasa wenno ‘tay pakaanayan ti aramiden a pudding.

4. Perpersayen dagiti tinapay wenno iw-iwaen iti babassit a pakuadrado ken ikabil iti tray. Sekseken ti tray. No agusar ti pasas ken dadduma pay a dried fruits, ikabil metten ditoy. Ibukbuok ditoy ti mixture ti itlog ngem saan a punuen agingga iti ngarabna tapno saan nga agluppias no umalsa ti custard.

5. Iluto iti oven iti 30-45 minutos wenno agingga maluto. Naluton ti pudding no tinudok mo ti toothpick ket awan ti kimpet a custard wenno namagan.

6. No awan ti oven, isaang iti pagpasengngawan a kaserola wenno steamer. Pasengngawan a kasla puto wenno leche flan ngem nasken a kaluban ti foil tapno saan a matedtedan ti danum.

7. Adawen ken idasar a napudot ngem mabalin met a nabaaw. Parabawan ti fresh fruits, no agusar, kas ti strawberries, blueberries, raspberry, saba ken dadduma pay. # nordis.net

Share

Leave a Reply