Makan a la Pinoy: Arroz a la Valenciana Negra

Ni BRENDA S. DACPANO
www.nordis.net

Ti arroz a la Valenciana ket manipud idi Spain. Kas ti piesta, daytoy a putahe a naggapu iti Spain ket paseten ti kultura ken putahe a maidasdasar kadagiti ispesial nga okasyon. Gapu ta Disiembre manen ken agsasaruno manen dagiti piesta ken Christmas party maibagay a balonen daytoy a kas potluck wenno idasar kadagiti party ta addan amin ditoy, sidaen (ulam) ken innapuy.

Arroz a la Valenciana Negra. Photo by Candice Mangili

Ramen:

1 kilo diket wenno regular a bagas a nalukneng
1/2 kilo pusit
1/2 kilo manok, adobo cut
2 chorizo de Bilbao, naiw-iwa
4 bell pepper, naiwa iti dadakkel
1 lata garbanzos
1 lata green peas
1 sibuyas, tinadtad
4 ngipen a bawang, tinadtad
asin ken paminta a pangtimpla

Panangisagana:

1. Iluto ti diket a kas ti panangiluto ti ordinario nga innapuy.

2. Dalusan ti pusit, saan nga ikkaten ti tintana. Paik-ikan.

3. Ipapudot ti paellera wenno pariok, iluto ditoy ti chorizo agingga masisi ti tabana ngem saan nga itosta. Adawen.

4. Igisa ti pusit iti mantika ti chorizo, adawen.

5. Igisa met laeng iti parehas a pariok dagiti sibuyas, bawang ken manok. Timplaan iti asin ken paminta. Tanangen laeng ti asinna ta naapgad ti chorizo.

6. No naluton ti manok, ipisok ti bell pepper, garbanzos ken green peas.

7. Isaruno nga ilaok ti naluto a diket wenno innapuy ken ilaok met ti naluto a pusit. Kiwaren.

8. Idasar a napudot. # nordis.net

Share

Leave a Reply