Food security ken nutrition program idiay Kalinga

Ni NORDIS
www.nordis.net

BAGUIO CITY — Ti Ag-agama Western Uma ket maysa kadagiti tallo (3) a barangay a mangbukbukel iti Tribu ti Uma iti munisipyo ti Lubuagan, Kalinga. 87 a bubong/pamilya idi panawen a simrek ti Montanyosa Relief and Rehabilitation Services (MRRS) idi ken Cordillera Disaster Response and Development Services (CorDis-RDS) itatta ken nagbalin a 99 a bubong/pamilya iti agdama.

Ti kadagaan ket narangkis ken limitado dagiti kinelleng a payaw. Numampay panagtalon ti kangrunaan a paggapuan ti makan iti ili, agkurkurang daytoy isunga ti nagbalin a paggapuan ti pangkabiagan ket ti nasaknap a panagmula iti Baguilas/Bitwelas, panagmula ti buybuy/tiger grass a maaramid a sagad, sayote ken ti emergency a tungsuy. Amin dagitoy ket mailako iti Tabuk ken agsubli a bagas iti ili.

Babaen iti Timpuyog dagiti Mannalon ti Kalinga (TMK) ken Kalinga Coordinating Body (KACB), naislipu kami iti MRRS. Immay ti MRRS ken TMK/KACB staff iti lugar mi idi 1996. Babaen iti maysa a community workshop nga in-facilitate dagitoy, nabukel mi ti obhetibo a kasasaad ti ili iti pang-ekonomya, pampulitika ken pangkultura. Ditoy a natudo dagiti pagpigsaan ken pagkapsutan ti ili ken nu ania dagiti umannatop nga aramiden.

Idi tawen 1998, naibangon ti Ag-agama Community Organization (AgCO). Naisayangkat dagiti naduma-duma nga innadal ken trainings kas iti kasasaad iti tukad probinsyal, rehiyunal, national. Leadership training, CPA, TMK, MRRS orientations ken dadduma pay.

Batay iti resulta ti workshop ken panag-sukisok, panang-konsolida iti naibangon a People’s Organization (PO) ken iti pang-ekonomya nga aspeto ti talmeg ti maipaay nga assistance iti lugar bayat a kitikitaen met laeng ti pang-pulitika ken pang-kultura nga aspeto iti ili. Iti daytoy a panawen, adda ti Food Security & Nutrition Improvement Program (FSNIP) wenno panangpaadu kadagiti nasustansya a makan agraman ti sanitasyon.

Babaen iti daytoy a programa, naiyun-una ti panang-construct iti water works ken irrigasyon. Naipaayan kami kadagiti dispersals kas iti bukbukel (betwilas, pechay, parya, lettuce, tarong) tilapia, farmtools ken animales(baboy ken nuang). Kasta met iti panagkilo ken panagpurga (deworming) kadagiti ubbing, naikkan kami iti botika ken nangiyaramid kadagiti kasilyas (CR).

Iti tunggal tipo ti proyekto, adda kabatug na a training ken innadal kas iti pangi-preserba iti bin-I, innadal dagiti mangimaton iti botika, panagkapon iti baboy. Nabukel dagiti committees iti uneg ti AgCO kasta met dagiti policies ken annuroten . Amin dagitoy ket nai-yimplementar iti panagtinnulong mi nga umili nga awan tangdan wenno labor ken iti naanus a panang-asistar ti MRRS ken TMK staff.

Saan met a mailibak a dimmalan kami iti nasikor ken adu a risisiris iti uneg ti ili gapu iti nagduduma a panagbuya ken panangipataros iti kaipapanan ti kayat mi a “Panagdur-as” ngem idi naipagna dagiti adu nga innadal ken binningay kadagiti kapadasan, nabigbig mi a daytoy a programa ti maysa a nag-puonan mi a nangitul-tuloy kas paset ti programa iti AgCO ken naki-alyado ken ti pannaki-silpu mi iti dadduma pay nga organisasyon iti ruar ti barangay. # nordis.net

Share

Leave a Reply