Balligi ti maika-12 a kongreso ti CPA-MP

Ni JOYCE LIPATO
www.nordis.net

BONTOC, Mountain Province — Naballigi nga insayangkat ti Cordillera Peoples Alliance Mountain Province ti maika 12 a kongreso na idi Nobyembre 30, 2017. Addaan tema nga: “Isikad, Aywanan, Ilaban nan Karbengan ya Katagowan”, dinar-ayan daytoy ti 110 a delegados a naggapo iti membros ti Apit Montanyosa, Binnadang, MAITUD, MPYA, individual membros ken ubbing ti Cordillera People Alliance manipud iti 7 a munisipyo ti probinsya.

Windel Bolinget, CPA regional chairperson, giving his keynote address during 12th congress of CPA – Mountain Province at Multipurpose Hall, Bontoc in Mountain Province. Photo courtesy of Joyce Lipato

Manipud iti panggep na daytoy, nagiinnadal, naikkan ti pammadayaw dagiti banwar, nakapagplano ken napili kadagiti baro nga opisyales ti CPA Mountain Province. Kasta met a nag workshop dagiti ubbing iti cultural nga inda inpabuya.

“Reppeten ti bileg tayo a mangduprak kadagiti tarigagay dagiti agar-ari a dasig ken gobyerno a mangdadael ti pangkabiagan, aglawlaw ken bukod a pangngeddeng. Narungsot ti agdama nga estado, isuna ti numero uno a mangipatpatungpal ti terorismo, adu ti biktima ti EJK (Extra-judicial killing), adu ti napilitan a nagbakwit, adu ti nakassuan kadagiti parbo a paspasamak ken militarisasyon iti kaaw-awayan isu a kasapulan tayo ti nalawlawa pay a bilang dagiti umili a makipagkaykaysa ket saan tayo nga agpatingga ditoy probinsya tayo gapu ta masapol nga agtitinnulong dagiti nakukurapay nga sektor ken umili ti pagilian. Saan a lipatan dagiti inbatin dagiti banwar a balitok nga adal manipud ti panangsalaknib da kadagiti tawid tayo a daga ken kultura, nga agbalin dagitoy nga armas tayo iti pananggun-od ti naan-anay a balligi” kuna ni Marcelo Daweg, CPA MP Chairperson a kas panangwelcome ken pananglukat na iti daytoy nga aktibidad.

Naikkan panangbigbig kadagiti liders a nangirugi ken nangidaulo iti panang-aywan ken pannakilaban iti nainsigudan a daga ken bukod a pangngeddeng. Napadayawan met laeng dagiti martir ken banwar a nangibuwis iti anges ken biag da.

“Iti panangisikad ken panangilaban iti karbengan ken panangaywan iti katagowan, kasapulan a daytoy a laban ket nakapauneg iti panakidangadang a manggibus iti tallo a basaran a problema ti umili nga Imperyalismo, Burukata Kapitalismo ken Pyudalismo ken ti naisangsangayan a problema a nailian a pannakaidadanes ti Kordilyera.

Ammo tayo a dakkel daytoy a sakripisyo ngem awan met sabali a pamuspusan no saan a ti pangkaykaysa, panagpatibker ti intar ket ilaban ti daga biag ken dayaw. Ti pudno a kappia ken talna ket naibasar ti pudno nga hustisya iti kagimongan, addaan demokrasya ken bileg ti umili. Dayta a bileg iti umili ket gun-oden babaen ti sipipinget a pangilaban kadagiti karbengan tayo. Ituloy nga ilaban dagiti naillian ken demokratiko nga interes ti umili kadagiti nadumaduma nga isyu ken pakaseknan. Papigsaen ken palawaen ti suporta kadagiti nadumaduma nga isyu. Papigsaen ken palawaen ti suporta iti tignay masa iti probinsya manipud regional, national inggana international kinuna ni Windel Bolinget, CPA Chairperson ti region iti keynote message na.

Iti mensahe ni Atty Maxie Dalog Jr, kunana a makipagkaykaysa isu iti tema ti Kongreso a kasapulan nga, “Isikad, Aywanan, Ilaban nan Karbengan ya Katagowan”, ta basol tayo iti Apo no saan tayo nga aramiden daytoy. Masapul nga ituloy tayo ti inrugi a laban dagiti Aappo tayo.

Napabaro met dagiti opisyales na ket naiyaramid ti pannakaipatugaw babaen kenni Windel Bolinget, ti Chairperson tayo iti CPA regional.# nordis.net

Share

Leave a Reply