Youthspeak: Protesta laban iti US-Duterte iti ASEAN

Ni ALJUN DAVE AGUINALDO*
www.nordis.net

Dagiti nainsigudan nga umili iti intero a pagilian agraman ti Igorot, Lumad ken dadduma pay a naggapu iti nadumaduma nga organisasyon ti umili kas ti Cordillera Peoples Alliance(CPA), PIGSA Katribu, Anakbayan ken Kalumaran ket nakipaset iti dakkel a protesta a lumablaban iti imperyalista nga US-Duterte idi Nobyembre 9-14, 2017 idiay Manila.

Kagiddan ti Association of Southeast Asian Nation (ASEAN) Summit ti naisayangkat a protesta a binukel dagiti grupo wenno organisasyon a naggapu iti nadumaduma a rehiyon ditoy Pilipinas. Adda met nakipaset a naggapu iti sabali a pagilian kas ti Amerika, Taiwan ken dadduma pay sumupsuporta iti agdama a kampanya kontra-imperyalista.

Dakkel met laeng ti pinaset dagiti agtutubo iti serye ti protesta. Dagiti agtutubo ti nandidaulo iti naballigian a protesta iti sango mismo ti lugar ti summit idiay Manila idi Nobiembre 12. Uray met laeng ditoy Baguio, pimassetda iti naiyaramid a protesta.

Naisayangkat daytoy a protesta tapno iparang ken idanon ti boses ken kiddaw ken ni Presidente Rodrigo Duterte nga isardengnan ti pannakikadua ken kinaaso-asona iti presidente ti Estados Unidos (US) a ni Donald Trump. Kas ti agtutubo, rebbeng laeng a sumilpo tayo iti daytoy a laban nga addaan panggep a mangpasardeng iti neoliberal nga atake wenno imperyalista a kontrol iti pagilian tayo ti dakdakkel a pagilian kas ti US.

Daytoy nga imperyalista a kontrol ti makaigapu no apay nga agtultuloy ti kinarigat ti biag ti umili ti Pilipinas. Daytoy met laeng ti mangidadaulo iti neoliberal nga atake iti nadumaduma a sektor kas ti mangmangged, mannalon ken agtutubo. Mangilukat daytoy iti merkado tayo a mangpalaka iti lokal a produkto wenno liberalisasyon, pribatisasyon iti serbisyo kas ti edukasyon ken salun-at, ken deregulasyon iti presyo dagiti produkto.

Kadatayo a nainsigudan nga umili, daytoy met laeng nga imperyalista a kontrol ti makaigapu ti panangagaw iti nagtaudan tayo a daga ken ti pannakaitakder iti dakdakkel a makadadael a kompanya para iti mamagsakop a panagdur-as kas dagiti minas, dam, kdpy.

Ngem kas ti gagangay, linappedan dagiti pulis a makaasideg dagiti raliyista iti Malacañang Palace nga isu’t ayanda Trump ken Duterte ken dagiti lider ti pagilian nga adda iti South-East Asia babaen ti panagusarda iti pang-or, bombero ken ti inted ti US nga sonic weapon.

Pinuoran dagiti raliyista ti bandera ti US ken imahen wenno effigy da Pres. Trump ken Duterte kas panangipakita iti ungetda kadagiti nasao a lider. # nordis.net

*Aljun Dave Aguinaldo is a member of Progressive Igorot for Social Action (PIGSA)

Share

Leave a Reply