Makan a la Pinoy: Tinapa-itlog kinirog nga innapuy

Ni BRENDA S. DACPANO
www.nordis.net

Ti panagkirog iti innapuy ket maysa a wagas ti panagusar kadagiti tedtedda nga innapuy ken sida (viand) tapno mapabaro manen ti taraon.

Tinapa-itlog kinirog nga innapuy a naparabawan ti (manipud iti ngato, clockwise) itlog a nalabaga, kamatis, poque-poque, binatil nga itlog, (tengnga) prito a tinapa a naperpersay a naparabawan ti bilis/tuyo ken nawarakiwakan ti kinirog a lengnga a nangisit ken puraw. Photo ni Brenda S. Dacpano

Kasayaatan a kirogen ti kilabban ngem no awan ket mabalin met ti kalluto. No agusasr ti kalluto kasapulan a pabaawan wenno iwaras iti bigao wenno baking tray tapno nadardaras a mabawaan . Kasayaatan nga usaren ditoy ti Sinandomeng wenno ‘tay saan a nalalukneng/napigket nga innapuy tapno saan nga agtitipkel.

Mayat nga ilaok iti kinirog dagiti itlog, pinerpersay a tinapa ken bulong ti sibuyas. Adu ti inlaokko iti kinirog ko nga innapuy a binalonko iti picnic potluck a napanak iti kallabes. Adtoy dagiti ramenna.

Ramen:

4 tsupa a bagas, naluto ken nakilabban
½ kilo tinapa, naisiitan ken naperpersay
8 itlog, binatil ken naiprito iti naingpis
6 itlog a nalabaga/salted eggs
1/3 tasa soy sauce wenno asin
1 sibuyas, naiwa iti pino
1 ulo a bawang, natadtad
mantika
½ tasa bulong sibuyas, naiwa iti babassit
4 kutsara lengnga, nakirog

Panangisagana:

1. Ramasen ti kilabban ngem saan a pekkelen tapno saan nga agteteppkel .

2. Ukisan ken iw-iwaen iti babassit dagiti nalabaga nga itlog. Ipaigid pay.

3. Iti dakkel a pariok, iprito iti nakapsut nga apuy ti binatil nga itlog. Kaingpisen laeng. Mabalin a mamintalo a saang ti 8 a binatil nga ilog. Ipaigid ken pabaawan. Iw-iwaen iti babassit a kuadrato.

4. Iti isu met laeng a pariok, iprito iti mantika ti naperpersay a tinapa agingga ag-brown wenno nasarangsang bassit. Adawen ken paik-ikan.

5. Iti isu met laeng a pariok, igisa ti bawang ken sibuyas agingga nalukneng bassit/malpes ti sibuyas. Ipisok ti innapuy. Ikirog iti kalalainganna a pudot ken kiwaren sagpaminsan tapno saan nga agittip. Timplaan iti soy sauce wenno asin. Iluto agingga 10-15 minutos a sagpaminsan a kiwaren.

6. Ilaok iti kinirog nga innapuy ti amin a ramen ngem mangibati iti saggabassit tapno adda iparabaw iti kinirog inton maidasar.

7. Adawen ti kinirog iti dakkel a bandehado ken iparabaw dagiti imbati a ramen a para ditoy. # nordis.net

Share

Leave a Reply