Makan a la Pinoy: Thai curry paste

Ni BRENDA S. DACPANO
www.nordis.net

Ti curry paste ket a naaramid manipud iti nagango wenno fresko nga herbs ken spices. Adu ti mabalin a paglaoken a kombinasion isu a nadumaduma met ti ramanna depende iti usaren a ramen. Ti curry ket maibilang a savory ken spicy a mabalin nga ilaok iti karne ti baka, manok, ikan/lames, pasayan, natnateng ken dadduma pay.

Chicken in red curry paste and yogurt. Photo by Brenda S. Dacpano

Ti curry ket naggapu iti Thailand, India, Pakistan, Sri Lanka ken dadduma pay a pagilian iti Abagatan a Daya nga Asia (Cambodia, Laos, Vietnam, Malaysia).

Nadardaruy ti Thai curry ngem ti Indian curry. Ti kangrunaan a ramen ti Thai curry ket fresko a sili, baraniw, bawang, lasona/sibuyas, galangal, bulong wenno ukis ti dalayap/lime, ramut ti cilantro/wansoy ken aramang a bugguong (shrimp paste).

Ti Indian curry ket malaokan ti nagango wenno namaga a ramen kas ti fenugreek, paminta, asafetida, allspice, cardamom, cinnamon ken nutmeg.

Adda innem a kangrunaan a kategoria ti Thai curry segun iti kolorna: green curry, red curry, yellow curry, orange wenno sour curry, panang curry ken masaman curry.

Ti green curry paste ket kombinasion ti fresko a berde a sili, lasona, baraniw, paminta a puraw, bulong wenno ukis ti dalayap, ramut ti cilantro, bawang, bulong ti Thai basil, bugguong nga aramang ken asin. Maibagay nga ilaok iti karne ti baka, manok wenno ikan.

Ti red curry paste ket aglaon ti nalabaga a sili, ramut ti cilantro, bawang, lasona, cumin, ukis ti dalayap, paminta, baraniw, turmeric (luyang dilaw), bugguong aramang , asin ken galangal (kalanglanga ti laya ngem natangtangken). Maibagay iti karne ti baka, baboy, manok, pato ken pasayan.

Ti yellow curry paste ket nasam-it ken spicy. Aglaon ti turmeric, coriander, baraniw, cumin, galangal, bugguong aramang, nagango a nalabaga a sili, laya, lasona ken asin. Maibagay iti nadiguan ken nagettaan a manok.

Ti orange curry paste ket naalsem ken kadawyan a malaokan ti danum imbes a getta ti niog. Bassit laeng ti ramen daytoy: lasona, nagango a nalabaga a sili, turmeric, bugguong aramang ken asin, ken pespes ti salamagi, piña wenno perres.

Ti panang curry ket manipud iti maysa nga isla nga asideg iti Malaysia. Usaren daytoy para iti nanannanam, nasamsam-it ken namaga a curry. Aglaon met laeng ti nagango a nalabaga ken atiddog a sili, galangal, baraniw, bawang, ukis ti lime, ramut ti coriander, paminta ken bugguong aramang. No dadduma ket malaukan pay ti mani. Maibagay iti karne ti baka ken maituno a karne.

Ti Masaman curry ken impluwensia ti Persian. Manipud iti abagatan a Thailand a kaaduan nga agnanaed sadiay ket Muslim. Mailaok iti karne ti karnero, baka wenno manok. Malaksid iti gagangay a ramen ti curry, malaokan met ti mani, cinnamon, puraw a cardamom ken nutmeg.

Panagaramid ti curry:

1. Ikirog dagiti namaga a ramen kas dagiti bukel ti coriander, cumin, cardamom tapno rumuar ti lana ken raman ti bukbukel. Galgalipen iti babassit dagiti fresko a ramen. Paglaoken amin a ramen (namaga ken fresko) iti food processor wenno bayuen iti alsong/almires.

2. No napalet unay, laokan ti getta ti niog, yogurt wenno danum. Innayaden nga ipatedted ti likido iti food processor wenno iti almires.

Panagluto iti curry:

1. Igisa ti curry paste iti bassit a mantika.

2. Ilaok ti karne a ramen (baka, manok, ikan, tofu wenno aniaman a kayatyo a protina) wenno natnateng kas ti karabasa, tarong, patatas, carrots, bell pepper, kdpy.

3. No kayatyo a nadaruy, nayonan ti getta ti niog, yogurt wenno danum.

4. No kurang ti ramanna, timplaan iti patis wenno asin, nayonan ti sili wenno paminta.

5. Idasar a napudot kakuyog ti innapuy wenno flat bread. # nordis.net

Share

Leave a Reply