Makan a la Pinoy: Spanish-style ken gourmet tuyo

Ni BRENDA S. DACPANO
www.nordis.net

Napadasyo kadin ti nagluto ti Spanish-style a bangus wenno aniaman a klase ti ikan wenno lames? Pinadasko nga aramiden daytoy iti tuyo wenno karing a tamban/bilis/herring tapno maiduma iti gagangay a pinirito a tuyo nga insiwsiw iti suka nga Iloco.

No mapanka mangan kadagiti restaurant, nangruna kadagiti medyo social, a kas kunada, adda iti menu-da ti pasta a nalaokan ti karing. Simple met laeng ti langana, pasta nga addaan tomato sauce, naparabawan ti naperpersay a tuyo ken nawarakiwakan ti keso ngem nagngina. Kuna dagiti nagadal iti kunlinaria a panangangaw, nangina ngamin ti plating wenno panangisimpa/presentasion iti taraon iti pinggan ken ti ambiance.

Ti gourmet ket ideal a kultural dagiti adda iti sociedad mainaig iti kulinaria iti “fine food ken drink,” haute wenno high class wenno uso. Awan ti dakesna ti pinirito wenno tinuno a tuyo, padasentayo laeng ti dadduma a wagas ti panangisagana ti tuyo tapno saantayo a mauma iti isu met la isu a taraon.

Ideal daytoy a balonen wenno ipaw-it kadagiti kakabagian iti abroad ta ready-to-eat ken naipaketen iti lata wenno garapon.

Spanish-style tuyo

Ramen:

1/4 kilo tuyo/bilis
1 pidaso carrots, naiwa iti nagbukel a naingpis
5 pidaso atsara a lasona wenno
2 pidaso pickled pipino, naiwa iti naingpis
1 bulong ti laurel
5 pidaso a sibubukel a paminta
1/4 tasa olive oil (wenno canola oil)
1/4 tasa white wine (optional)
2 pidaso sili a sairo (optional)

Panangisagana:

1. Ikkaten ti lalaem (laman loob) ti tuyo ken ulona. Iprito iti mantika ken ikkaten ti siit ken siksikna. Urnosen ti tuyo iti isterilisado a garapon nga adda kalubna.

2. Iti kaserola, ipapudot ti olive wenno canola oil iti kalalainganna a pudot. Ikabil dagiti nabatbati a ramen malaksid iti tuyo. No nagbureken, patayen ti apuy ken pabaawan sakbay nga ibukbok iti garapon ti tuyo agingga malipus ti tuyo. Bay-an a maiyuper iti dua nga aldaw sakbay a kanen wenno usaren a sagpaw ti pasta.

Spicy gourmet tuyo in oil

Ramen:

½ kilo tuyo
½ tasa corn/canola oil
½ tasa olive oil
2 ulo ti bawang, napitpit
½ tasa suka
1 kutsara a sili a sairo, tinadtad
1 kutsarita paprika powder

Panangisagana:

1. Ikkaten ti lalaem ti tuyo ken ulona. Iprito iti mantika ken ikkaten ti siit ken siksikna. Urnosen ti tuyo iti isterilisado a garapon nga adda kalubna.

2. Iti kaserola, ipapudot ti mantika (olive ken corn/canola oil) iti nakapsut nga apuy. Mabalin nga agusar ti sabali a mantika no la ket di saan nga agbalay iti nalamiis a lugar ti mantika.

3. Iprito ti bawang ngem annadan a saan a makset ti apuy.

4. Ilaok ti suka ken sili a sairo. Pagbureken ken ilaok ti paprika powder. Ibukbok daytoy iti garapon ti tuyo. Pabaawan ken idulin iti uneg ti refrigerator iti dua nga aldaw tapno tumanep ti raman dagiti ramen sakbay, ilaok iti pasta wenno toppings ti pizza. # nordis.net

Share

Leave a Reply