Makan a la Pinoy: Kikiam

Ni BRENDA S. DACPANO
www.nordis.net

Popular nga street food ti kikiam ditoy Pilipinas nangruna kadagiti sentro ken siudad ta adu dagiti agsursursor nga agilaklako iti kikiam, fish balls ken kapadana a saramsam a tinudok. Dagiti saan a familiar iti langa daytoy a makan, immaratiddog daytoy a kasla ibleng ti tao (dispensar apo, ngem aglanglanga a kasdiay).

Bangus kikiam. Photo by Brenda S. Dacpano

Pinadasko ti agaramid ti kikiam ta puro met nga arina a nalaokan ti sibuyas ti magatang iti tiendaan ken nalaokan pay ti preservative. Kayatko a kangrunaan a ramen dagiti ikan, lames, pusit ken dadduma pay. Bangus ti immuna nga inaramidko a kas experimento. Adda binaliwak, nagnayon ken nagkissayak kadagiti ramen iti maikadua nga inaramidko a kikiam a pasayan. Uray ania a lames wenno ikan ti usaren ditoy ngem nasaysayaat diay puraw ti karnena ta naluklukneng kas ti lapu-lapu ken maya-maya. Mayat met nga ilaok ti pusit, karne ti baboy wenno manok wenno puro a nateng (bulbulong ti wansoy ken marunggay, wenno carrots, karabasa). Mabalinyo latta a sukatan ti kangrunaan a ramen iti aniaman a ramen a kayatyo. Adda iti panageksperimento ken panagtarkuat ti excitement ti panagluto.

Ramen:

(Makaaramid iti 33 pidaso)
½ kilo pasayan
1 dakkel a sibuyas
4 ngipen a bawang
1 kutsarita asin
1 kutsara patis
1 kutsara asukar
½ kutsarita paminta a pulbos
1 kutsara mantika wenno sesame oil
1 itlog
1 tasa danum (panglambong iti ukis ti pasayan)
¼ tasa bulong ti wansoy/cilantro (optional)
1 ½ tasa arina
1 tasa cornstarch/gawgaw
3 tasa a mantika

Panangisagana:

1. Ukisan dagiti pasayan. Saan nga ibelleng dagiti ukisna ta segsegen daytoy wenno ipaburek iti 1 tasa a danum santo sagaten ket ireserba ti naglambongan.

2. Iti blender, paglaoken amin a ramen malaksid iti wansoy, arina, gawgaw ken mantika a pangprito. Ikabil ti naglambongan iti ukis ti pasayan tapno. Nalaklaka nga agandar ti blender no adda likidona ti iblender. No awan ti blender, agusar ti alsong wenno almires. Bayuen agingga napino.

3. Aonen manipud iti blender/alsong ti mixture, ikabil iti dakkel a malukong wenno mixing bowl. Ilaok ti gawgaw ken arina ken wansoy (no agusar). Kiwaren a naimbag.

4. Iti pariok, papuduten ti 3 tasa a mantika. Ipakapsut iti kalalainganna a pudot ti apuyna apaman a nagburek ti mantika.

5. Mangkutsara iti mixture santo ipidas iti sianse (frying ladle) a kas makita iti ritrato. Karusen ti naipidas a mixture babaen iti kutsilio ken irolio, ken itinnag iti agburburek a mantika. Uliten daytoy agingga mailuto amin ti mixture ngem saan a paglubbonen iti pariok a maminpinsan tapno nasayaat ti pannakapritona.

6. Mabalinen a kanen a maisawsaw iti sweet-sour sauce, ketchup wenno suka a nalaokan iti tinadtad a lasona/sibuyas ken natimplaan iti asin ken asukar.

7. Mabalin met nga ipenpen iti uneg ti freezer, agbayag iti tallo a bulan. Mabalin nga usaren daytoy a naiw-iwa a sagpaw iti gisado a pansit wenno sagpaw iti sabaw kas ti ramen noodle soup, egg noodle soup, mami wenno miso soup, miso-kimchi soup. # nordis.net

Share

Leave a Reply