Isardeng ti pananglipit iti karbengan tao — Sapit

Ni ALDWIN QUITASOL
www.nordis.net

SIYUDAD TI BAGUIO — Maysa nga organisasyon ti umili, ti Salakniban Pita Takay (Sapit) idiay munisipalidad ti Sallapadan, probinsiya ti Abra ti nangibutaktak a pinangpangtaan ti gobernador ti probinsiya ken ti dadaulo ti soldado a nakabase idiay dagiti umili tapno saan nga dumar-ay iti maysa nga aktibidad ti nasao nga organisasyon.

Segun iti maysa a pablaak ti Sapit, idi 15 ti Septiembre 2017, nangisayangkat ti Probinsya ti Abra iti medical mission iti Sallapadan. Ditoy kano a nagsarita ni Gov. Jocelyn Valera Bernos, ket pinangtaan na ti umili ti Sallapadan a saan da umatendar iti aktibidad ti SAPIT a maangay iti kabigatan na idiay Sallapadan Barrio. Sinarunuan met daytoy ni Lt. Colonel Dominic Baluga Commanding Officer ti 24th Infantry Battalion ti Philippine Army a nu ituloy ti SAPIT ti aktibidad na ket ipan na ti tropa na idiay Sallapadan Barrio.

Ti 24th IBPA ket nakabase iti Lagangilang, Abra.

Nayon pay ti Sapit, kalpasan ti panagsarita da Gov. Bernos ken LtC. Baluga, pinaayaban ni Gubernadora dagiti kapitan ti barangay ti Sallapadan. “Pinangtaan na isuda a nu saan da a lapdan dagiti aktibidad dagiti nabukel nga organisasyon kadagiti sakop da a barangay ken dagiti miting nga iyangangay dagiti sumsumrek kadagiti komunidad, saan a maituloy dagiti proyekto da, ken maikkat ti Internal Revenue Allotment (IRA) da. Ti maangay nga asembleya ti SAPIT ket inawagan na pay a pamiting kanu ti NPA, isunga awan kanu ti umatendar nga umili, ta nu matuloy ti miting ket agibaon isuna iti militar,” butaktak ti organisasyon.

Gapu iti daytoy segun iti Sapit, nangted iti nakaro a buteng kadagiti umili daytoy a pannarita ti Gubernadora, karkaro ta tuloy-tuloy met ti panangipablaak na iti radio (DZPA) a saan nga umatendar dagiti umili iti Sallapadan iti aktibidad ti SAPIT ken anyaman a taripnong nga iyaramid dagiti nabukel nga organisasyon iti komkomunidad.

“Daytoy a maararamid iti probinsya ti Abra ket pakabuyaan ti Martial Law. Daytoy ket panangipaidam iti demokratiko a karbengan ti naruway nga umili a tungtungen ken addangan dagiti sangsanguen da a parikut iti biag ken kabiagan. Daytoy ket pananglabsing dagiti agturturay ken ti puersa a militar iti karbengan tao!” pananggibus ti Sapit iti pablaak na. # nordis.net

Share

Leave a Reply