Makan a la Pinoy: Caliente

Ni BRENDA S. DACPANO
www.nordis.net

Caliente, manipud iti Español a mairamut iti Latin a calēntem wenno napudot iti Ilokano.

Caliente. Photoby Noel Godinez

Kilawen a kudil ti baka a maibilang nga exotic food ti Ilokano. Saan met a literal a kinilaw wenno saan a naluto ta narigat met a kilawen ti nakulbet a kudil ti baka no di ket naisagana a kas kilawen a gagangay a matimplaan iti suka, sibuyas ken dadduma pay. Kadawyan a maaramid a pulutan ngem mabalin latta met nga ipangan iti innapuy.

Ramen:

½ kilo a kudil ti baka
½ tasa suka nga Iloko
5 lasona wenno 2-3 sibuyas nalabaga
1 kasla tangan a laya
asin ken paminta a pangtimpla
sili (optional)
bulong ti sibuyas (optional)
perres a kalamansi wenno dalayap (optional)

Panangisagana:

1. Dalusan ken ikkaten dagiti nabati a buok iti kudil ti baka. Bugguan ken angeren ti kudil agingga nalukneng. No adda pressure cooker, iluto ditoy tapno mabibiit a lumukneng ti kudil. Timplaan iti bassit nga asin ti pagangeran a danum. Adawen ken pabaawan.

2. Iwaen iti naingpis dagiti lasona/sibuyas ken laya.

3. Iwaen met iti naingpis ti kudil ti baka, agarup ¼ pulgada kaingpis ken 1-1 ½ pulgada kaatiddog.

4. Iti dakkel a malukong, paglaoken amin a ramen. Perresan ti kalamansi wenno dalayap, no agusar. Bay-an a mauper iti 15-20 minutos sakbay nga idasar. # nordis.net

Share

Leave a Reply