Makan a la Pinoy: Binakle

Ni BRENDA S. DACPANO
www.nordis.net

Ti binakle ket kankanen a suman iti Ifugao a binayo a diket a “dayakkot” a malaokan ti lengnga ken mabalkot iti bulong ti saba. Tradisional a maisagana iti komunal a ritual kalpasan ti panawen ti apit kas panagyaman iti kasiburan.

BINAKLE. Ti binakle ket kankanen a suman iti Ifugao a binayo a diket a “dayakkot” a malaokan ti lengnga ken mabalkot iti bulong ti saba. Photo by Brenda S. Dacpano

Kadawyan a dayakkot a diket a nainsigudan iti Ifugao ti mausar ditoy. Light purple ti kolor ti diket, mabayo wenno mapagbalin a pulbos ken malaokan ti bukel ti lengnga.

Ti binakle bersion nga inaramidmi ditoy Nordis ket puraw a diket a nalaokan ti nangisit a lengnga. Saanmi nga inlaok ti asukar, nagaramidkami ti naisina a sawsawan nga arnibal, asukar a nailuto iti getta ti niog.

Ramen ti binakle:

1 kilo a diket a napulbos
4-5 tasa a getta ti 2 a niog
1 tasa a lengnga, nakirog
Sangapirit nga asin
Bulong ti saba a nailanat

Panangisagana:

1. Bukbukan ti naigad a niog iti 4-5 a tasa ti apag-anam-an a danum. Pespesen agingga maala amin a gettana. Sagaten.

2. Ilaok ti getta iti pulbos a diket. Kiwaren ken imasa agingga agbalin a tapong.

3. Ilaok ti lengnga iti tapong. Bay-an a mauper ken umalsa bassit ti tapong iti agarup 20 minutos.

4. Balkuten ti dua a kutsara a tapong iti nailanat a bulong ti saba. Ikupin ti dua nga ungto ti bulong. Uliten daytoy agingga mabalkot amin a tapong.

5. Pasengngawan wenno ilingta a malipus iti danum iti 30-45 minutos wenno agingga maluto.

6. Isawsaw iti arnibal wenno cocojam.

Ramen ti sawsawan:

1 tasa nga asukar a brown
1 tasa a getta ti niog
1/4 tasa nga arina a diket
Paglauken dagiti ramen ti sawsawan iti pariok wenno napuskol a kaserola. Pagbureken bayat a kiwkiwaren agingga napalet. # nordis.net

Share

Leave a Reply