Makan a la Pinoy: Biko

Ni BRENDA S DACPANO
www.nordis.net

Ti biko wenno inkiwar/linatikan ket kankanen a diket a kadawyan a maisagsagana kadagiti panagkasangay. Nalaokan ti getta ti niog ket ladek.

BIKO. Photo by Brenda S. Dacpano

Gapu ta kasangay ti anak ti maysa ditoy Nordis, naglutokami ti imbag la pagsasanguan iti panagselebrar iti birthday.

Ramen:

2 tasa diket
1½ tasa danum
2 tasa muscovado/tagapulot/asukar nga asukar
2 tasa getta ti niog, umuna a pespes
2 tasa getta ti niog, maikadua a pespes
½ kutsarita asin

Panangisagana:

1. Arasawen ti diket ken iluto daytoy iti rice cooker wenno kardero a kas ti panagluto iti regular nga innapuy ngem basbassiten ti danumna.

2. Bayat a malutluto ti diket, ipaburek ti getta ti niog iti napuskol a pariok iti kalalainganna a pudot/apuy. No nagbureken, pakapsuten ti apuyna tapno saan a makset ti ladek. Sagpaminsan a kiwaren. Iluto agingga agmantika. Adawen ti ladek ken paik-ikan. Isina ti mantika ti niog.

3. Iti isu met laeng a pariok, ikabil ti maikadua a pespes a getta ti niog ken tagapulot wenno asukar. Pagbureken ken kiwaren agingga marunaw ti tagapulot. Ilaok ti diket. Kiwaren agingga aglaok amin a ramen ken agingga agmaga bassit. No nadekket unay iti pariok, patedtedan ti bassit a mantika ti niog ken kiwaren.

4. Adawen iti bigao a naap-apan ti bulong ti saba. Ipidas ti kankanen iti bigao tapno malimpia. Iparabaw ti ladek. # nordis.net

Share

Leave a Reply