Makan a la Pinoy: Adobo a saka ti manok

Ni BRENDA S. DACPANO
www.nordis.net

Kadagiti nababaknang a pagilian, ibelbellengda laeng ti saka ti manok ngem kadatayo a mamirmiraot a pagilian ket makan daytoy. Ngem saan met a kayat a sawen a no mangmanganka ti saka ti manok ket mamirmiraotkan. Kadatayo a Pilipino naaramat amin ti paset ti manok ken dadduma pay nga animal a maparte a sidaen. Kailala no ibelleng.

ADOBO A SAKA TI MANOK. Photo ni Brenda S. Dacpano

Nabaknang iti collagen ti saka ti manok, segun iti panagsukisok ti Department of Animal Science iti National Chung-Hsing University sadiay Taiwan. Ti collagen ket nasayaat iti salun-at, pagbalinenna a nalasbang ti kudil ken mangikkat iti sakit ken panagletteg dagiti susuop.

Nadumaduma ti panangisaga iti saka ti manok kadagiti agsasabali a pagilian. Idiay Malaysia, ipritoda daytoy a kripik wenno cracker – mailambong ken maiprito agingga nasarangsang a kasla sitsaron. Mailuto met iti green curry idiay Thailand. Idiay Hongkong ken China, maiprito ken mapasengngawan ti saka ti manok sakbay a mailambong iti tausi wenno mailuto a pangpapalet iti digo. Idiay Korea, matimplaan met iti gochujang (buro a sili/fermented chili paste) sakbay a maituno.

Ditoy Pilipinas, maawagan daytoy iti adidas manipud iti sikat a tatak ti sapatos nga Adidas. Mailuto nga adobo sakbay a maituno a kas pulutan wenno ipangan iti innapuy. Inyadobok ti ginatang ko a maysa a kilo a saka ngem saankon nga intuno. Mabalin met nga iluto daytoy iti sarsa a nagasang kalpasan a mayadobo.

Ramen:

1 kilo saka ti manok, naikkat ti kudil ken kukona
1 ulo a bawang, napitpit ken naukisan
½ tasa a suka
1/3 tasa soy sauce
2 kutsara asukar a brown
Asin ken paminta a pangtimpla
1 kutsarita anis wenno 2 pidaso star anise (no kayatyo)
2-3 tasa danum

Panangisana:

1. Paglalaoken amin a ramen, malaksid iti asukar.

2. Ipaburek iti nakapsut nga apuy iti agarup 45 minutos wenno agingga nalukneng ken dandanni maatianan. Kiwaren sagpaminsan.

3. Ilaok ti asukar. Kiwaren. Nayunan ti bassit a danum no namaga unay daytoy.

4. No panggepyo nga ituno, saan unay a paluknengen daytoy. Pabaawan ken tudoken iti ruting a pangbarbecue. Ituno iti beggang. # nordis.net

Share

Leave a Reply