Makan a la Pinoy: Biryani chicken

Ni BRENDA S. DACPANO
www.nordis.net

Biryani, biriyani wenno biriani, innapuy ken manok a nailuto iti spices ken yogurt. Mapatta-patta a manipud iti pagsasao a Persian a birinj, a bagas, wenno manipud iti sao a biryan wenno beriyan a ti kayat na a sawen ket prito/matosta/roasted.

BIRYANI CHICKEN. Photo by Brenda S. Dacpano/Nordis
BIRYANI CHICKEN. Photo by Brenda S. Dacpano/Nordis

Saan a sigurado no daytoy a luto ket nagtaud iti North India, ta sadiay ti pakakitaan ti adu a klase ti biryani kadagiti sentro ti Muslim idiay Delhi, ngem adda met laeng ti bersyon idiay South India. Segun iti nabasak a literatura maipanggep ditoy, basar iti historian a nakabase iti Delhi, dagiti umiti iti Central Asia, nasurok nga uppat a ribu a tawen ti naglabasen ket mangilalaok wenno mangisagsagpaw iti karne ti baka wenno kalding iti bagas nga inawaganda ti pulao (pilaf), a nagbalin a biryani.

Linutok daytoy sakbay iti baro a tawen tapno laeng naidumduma kumpara kadagiti tipikal a maisagsagana iti Paskua ken Baro a Tawen. Adu dagiti kasapulan nga spices ngem adda metten ti magatang a nakapakete a pang-biryani. Iti tiendaan ti Baguio, magatang daytoy P100 kada pakete iti bassit a grocery ken spice store iti Hangar Market, abay ti bagsakan dagiti highland vegetables.

Ramen:

3-4 tasa basmati rice
3/4 – 1 kilo manok, nategteg
¼ tasa mantika
2 sibuyas, naiw-iwa
5 ngipen a bawang, natadtad
2 pakete biryani spice mix
1 kutsarita a sili pulbos (optional)
Asin ken paminta a pangtimpla
1 kutsarita turmeric pulbos
3 a kamatis, naukisan, naiw-iwa
5 cardamom pods
2 tasa a yogurt
1 tasa a bulong ti mint
1 tasa a bulong ti wansoy (coriander)

Biryani spices (no awan ti ready mix spices):

1 kutsara laya, nagadgad/natadtad
½ kutsarita sili a pulbos
½ kutsarita paminta pulbos
½ kutsarita luyang dilaw/ turmeric pulbos
1 kutsarita cumin pulbos
1 kutsarita asin
½ kutsarita cardamom pulbos
1 stick cinnamon wenno 1 kutsarita a pulbos
3 whole cloves wenno ½ kutsarita a pulbos

Panangisagana:

1. Igisa ti bawang, sibuyas iti mantika. Inayon nga igisa ti biryani ready mix wenno spices. Igisa iti lima a minutos santo ilaok dagiti sili (no agusar), cardamom pods ken kamatis. Isaruno dagiti bulong ti mint ken 1 tasa a yogurt. Kaluban ken iluto iti nakapsut nga apuy, kiwaren sagpaminsan. No kasapulan, nayunan ti bassit a danum tapno saan a makset.

2. No napaleten ti mixture, ipisok ti nategteg a manok. Kiwaren ken kaluban. Iluto iti nakapsut nga apuy aginggana nalukneng ti manok, agarup 40 minutos. Saan a paatianan, masapul nga adda mabati a napalet a digona. Ikiwar ditoy ti nabati a 1 tasa a yogurt.

3. Iluto ti basmati rice a kasla panagluto iti innapuy ngem iluto laeng a half-cooked. Laokan daytoy ti bassit a basmati spice, cardamom ken 1 kutsarita a turmeric.

4. Iti napuskol a kaserola wenno crock pot, yap-ap nga agtutuon (layer) ti naluto a basmati rice ken naluto a manok ken spice mixture aginggana akin-rabaw ti manok. Iluto daytoy iti nakapsut nga apuy tapno malinay ti innapuy.

5. Idasar a napudot ken parabawen ti tinadtad a bulbulong ti mint ken wansoy. # nordis.net

Share

Leave a Reply