Statements: Deklarasyon ti panagpa-pull out ken back to barracks iti kameng ti AFP

Dagiti TIMMABUNO ITI SANGALUBUNGAN NGA ALDAW TI KARBENGAN TAO
www.nordis.net

December 10, 2016

Dakami a timmabuno iti selebrasyon International Human Rights Day a manipud iti naduma-duma a komunidad iti Kalinga a ket nagkaykaysa iti posisyon a pumanaw ken agsubli iti barracks amin a kameng ti Armed Forces of the Philippines (AFP) kadagiti barrio ditoy probinsiya. Napinget a kondenaren mi ti nasaknap ken nabayag a militarisasyon iti probinsiya a nagbunga iti saan a mabilang a panaglabsing dagiti kameng ti AFP iti karbengan tao. Iyebkas mi met laeng ti panangisardeng iti tuluy-tuloy a recruitment para iti Citizens Auxiliary Force Geographical Unit (CAFGU) a gapuanan ti pannakaburak ti panagkaykaysa mi kas nainsigudan nga umili.

Kas nainsigudan nga umili, ti pigsa mi ket nakabasar iti nairut a panagkaykaysa, ken nawaya a panagdesisyon iti pakaseknan ti ili. Dagitoy ti pakabuyaan iti karbengan mi a nainsigudan nga umili iti bukod a pangngeddeng. Ngem ti panagkampo dagiti militar iti uneg ti ili ket nangibunga iti gulo, pannakaburak ti panagkaykaysa, buteng, ken pannakabastos dagiti babbai. Nalawag a pakabuyaan ti kapadasan dagiti barrio iti Western Uma ken Tanglag iti Lubuagan; Apatan, Baay, Limos, Asibanglan iti Pinukpuk; Gawaan, Poswoy, Balantoy, Dao-angan iti Balbalan. Adun a daras nga inyebkas mi nga umili ti posisyon a pumanaw dagiti soldado iti uneg ti ili ngem saan pulos a narespeto. Ti panagkampo ti AFP nga awan pulos pammakada ken ti panangiyaleng-aleng iti posisyon ti umili ket nalawag a panagtagibassit ken pananglabsing iti karbegan mi iti bukod a pangngeddeng.

Iti madama a saritaan kappia iti baet ti Government of the Philippines (GRP) ken National Democratic Front of the Philippines (NDFP), napagkaykaysaan manen ti Comprehensive Agreement on Human Rights and the International Humanitarian Law (CARHIHL). Daytoy a katulagan ti mangprotekta iti karbengan ti umili iti tengnga ti agdama a gubat. Karaman iti daytoy a katulagaan a maiparit ti militar nga agkampo iti uneg ti komunidad. Kas panagrespeto iti madama a saritaan kappia, rebbeng na laeng a bigbigen ken ipatungpal ti AFP ti linaon na daytoy a katulagan.

Iparparit met laeng ti International Convention on the Rights of the Child, United Nations Declaration on the Rights of Indigenous Peoples, ken CAHRIHL ti panagkampo ti AFP kadagiti pasdek nga us-usaren ti ubbing karaman ti day care centers, ken iskuwelaan. Ti pagilian tayo a Pilipinas, adda met laeng ti linteg a mangiparparit a mausar dagiti iskwelaan a pagkampuan ti armado. Daytoy ket nakalanad iti Republic Act 9610 wenno ti makuna a “Schools are Zones of Peace.”

Iti probinsiya ti Kalinga, nasaknap ti panagkampo ti 50th Infantry Battalion ken CAFGU kadagiti komunidad. Iti Western Uma, Lubuagan, iti laksid ti panagkedked ti umili iti panagkampo dagiti soldado iti uneg ti ili, pinagbalin da a detachment ti balbalay, barangay hall ken Church rectory iti las-ud ti nasurok maysa a tawen. Adun a panaglabsing ti karbengan tao ti naidokumento agraman pammutbuteng, panangisagmak iti umili, ken panagbastos iti babbai. Iti Tanglag, Lubuagan, nagkampo met laeng dagiti kameng ti 50th IB iti nasurok maysa a bulan ngem napapanaw da gapu iti pigsa ken panagkaykaysa ti umili. Napaneknekan manen nga iti laeng panagkaykaysa ti umili ti napigsa a depensa kontra iti peggad a sumangbay iti ili.

Iti kalikagum a maisubli ti pudpudno a linak ken talna, napinget a supsuppiaten ti delegasyon ti International Human Rights Day a naangay ditoy Western Uma ti panagkampo ti 50th IB ken CAFGU ken dadduma pay nga istruktura ti militar iti probinsiya ti Kalinga. Agkaykaysa kami ngarud a patalawen dagiti kameng ti AFP tapno maisardeng iti kabiitan a panawen ti abuso.

Ipanawagan mi a maisardeng ti Oplan Bayanihan, counter-insurgency program a nangparigat iti umili. Iti kapadasan, ti Peace and Development Teams (PDT) ti AFP a nagkampo iti uneg dagiti komunidad ket gulo ken abuso ti inaramid da a maisupadi iti iparparang da a programa a nakabasar iti esensiya ti “bayanihan.” Suportaran mi dagiti petisyon ti nadumaduma a komunidad a mangpapanaw kadagiti elemento ti AFP a nagkampo iti uneg ti ili. Maipangpangruna ti petisyon ti Western Uma a saan pulos a narespeto.

Mamati kami a ti pudpudno a kappia ket magun-od laeng no masolbar dagiti ramut ti kinarigat ken pannakaidadanes dagiti umili a Pilipino. Suportaran mi ngarud ti agdama a saritaan kappia no sadinno ket matongtong dagiti reporma kadagiti basaran nga istruktura ti ekonomiya. Namnamaen mi a daytoy ti mangitonda iti pudpudno a panagbalbaliw ken kappia.

Daytoy a deklarasyon ket isubmitar mi kadagiti maseknan nga ahensiya ti gobyerno, iti simbaan, iti civil society organizations ken dadduma pay a mabalin a sumuporta iti panawagan ti umili ken ti daytoy a delegasyon.

Pirmaan mi ita nga aldaw ti Sabado, petsa iti 10, bulan ti Disyembre, tawen 2016 ditoy Ag-agama, Western Uma, Lubuagan, Kalinga.# nordis.net

(This declaration had more than 300 signatories, as of date. — Ed)

Share

Leave a Reply