Makan a la Pinoy: Block 4 pansit, hot cake ken ukay

By BRENDA S. DACPANO
www.nordis.net

Ti Baguio City Public Market ket napasen-paset iti Block 1 agingga Block 4, Caldero Section, Hangar Market, Hot cake Section ken dadduma pay. Idi dekada 60 adda paset ti tiendaan a naipaabang iti Maharlika Livelihod Center ken Marbay, adda met paset a naipaabang iti Baguio Hilltop Enterprises a nangipatakder iti Hilltop Hotel. Nargaay ti Hilltop Hotel iti ginggined idi Hulyo 1990, sadiay nakargaayanna, naipatakder dagiti carenderia, paglakuan iti tapey, moma, ken dadduma pay.

NAISEM KEN NAGAGET. Talugading ni Floribeth Dumaina a makaawis kadagiti kustomer iti Block 4, Baguio City Public Market. Photo ni Brenda S. Dacpano
NAISEM KEN NAGAGET. Talugading ni Floribeth Dumaina a makaawis kadagiti kustomer iti Block 4, Baguio City Public Market. Photo ni Brenda S. Dacpano

Nasimpan ti Block 4 itatta, kas iti Block 3, nasementon ken addaan dua a kadsaaran. Paglakuan kadagiti natnateng, ikan/lames ken nabiag a manok ken pato, ken ukay/wagwag wenno second hand a badbado iti baba. Iti akinngato a tukad ti panganan ken ukay met laeng. Sagpaminsan a mapmapanak sadiay a gumatang ti bubod wenno diket ken masansan nga iti akinbaba ti pakitiendaak ta nalaklaka ti magatang sadiay kumpara iti dadduma.

Iti sumagmamano a bulan, ayuyangmi ti Block 4, kakuyogko dagiti kaduak nga agwatwatwat iti aerobics-zumba idiay Burnham Park. Iti akintengnga a paset ti maikadua a kadsaaran ti Block 4 ket naintar dagiti panganan iti merienda, dumna met iti igid a makinkannigid ti panganan iti innapuy ken nadumaduma a sidsida. Kalpasan iti aerobics workout, mapankami agkape sadiay ken mangan iti hot cake. Nalaklaka ti presyo ti pancake ditoy kumpara kadagiti sikat a fastfood chain. Ad-adu pay ti pagpilian a toppings/palaman: butter wenno margarina, condensed milk, peanut butter, brown sugar wenno plain. Adda pangibulon a brewed wenno instant coffee, chocolate wenno softdrinks. Adda met ti unli lugaw, lugaw with egg ken arrozcaldo.

Sukimi a panganan ti Stall 218, ti makinlikod iti Snack Section ti Block 4. Ti puesto ni Floribeth ti kaaduan ti klase ti merienda a lako. Adda bread roll a napalamanan iti ham a kinunana a naimas nga isawsaw iti ketchup. Kalalainganna ti sam-it ti maja blanca, ginettaan a bilo-bilo ken biko. Ni Elsa, kaduak iti aerobics, ket masansan a gumatang ditoy nga iyawidna iti balayda. Mabsogkan iti P25 a lugaw with egg, maparabawan ti tostado a breadcrumbs ken bawang, ken pinulbos a sili.

Aguppat a tawenen nga aglaklako ni Floribeth Dumaina idiay Block 4. Saanna a sanikua ti karbengan iti puesto, masusuelduan isuna nga agbantay ken aglako. Kasadaranna ti maikadua nga anakko, 26. Nakalpas met koman iti kolehiyo, kunak iti nakemko. Idi dinamagko no apay a saanna nga intuloy ti kinamaestrana, kinunana a gapu iti kinarigat ti biag ket saannan a naituloy ti agbasa. Uray pay kayatna ti agturpos ket kapilitan a nagsardeng. Taga-Kiangan, Ifugao ti tatangna ken Bago iti La Union ti nanangna. Managisem ken nagaget ni Beth. Nadalimanek isuna isu a kayatko met a panganan iti ayanna ta nadalus uray pay awan ti lababoda. Iti laeng paset ti karinderia ti addaan koneksyon iti danum, lababo ken drainage. Awan ti paginnawan iti Snacks Section isu a nabalkot iti cellophane dagiti platito nga ipausarda ken disposable dagiti kutsara ken tinidor. No malpas kamin a mangan agtaroskamin a makitienda wenno mapan pay agwagwag iti met laeng paset ti Block 4 wenno idiay Block 3. # nordis.net

Share

Leave a Reply