Statements: Panangbale-awan iti kinapateg ti pakasaritaan

By SELDA-NL
www.nordis.net

Nobiembre 8, 2016

Binale-awan ti Korte Suprema ti kinapateg ti pakasaritaan itatta nga aldaw gapu iti desisyon ti siyam a mahistrado nga immannamong iti pannakaitabon ti bangkay ni Marcos iti Libingan ng mga Bayani. Sigigil-ayab a konkondenaren ti Samahan ng Ex-detainees Laban sa Detensyon at Aresto – Northern Luzon (SELDA-NL) daytoy a desisyon ti Korte Suprema.

Awan ti basaran ti Korte Suprema a mangited iti hero’s burial ken ni Marcos. Ti linteg a Republic Act 289, a mangikedkeddeng iti pannakapasdek ti panteon ti presidente ti Pilipinas ken dagiti bannuar ti pagilian a maiparbeng a pagulidanan, ken ti Proclamation 86 a nangbukel iti Libingan ng mga Bayani, a simbolo ti gapu ti pannakatay dagiti soldado ket saan a maiparbeng ken ni Marcos.
Ti desisyon ti Korte Suprema ket panangkillo ken panangrebisa iti pakasaritaantayo.  Panangbaliktad
daytoy kadagiti dati a desisyon ti Korte Suprema a ni Marcos ket diktador (kaso a Marcos vs. Manglapus), naglabsing kadagiti karbengan tao (kaso a Mijares vs. Ranada) ken plunderer wenno agtatakaw (Republic of the Philippines vs. Sandiganbayan) no sadinno a nagtakaw iti P32 bilion ken inlemmengna idiay Swiss bank.

Pammaneknek ti kinadangkok ti rehimen a Marcos ti rinibribu a biktima ti martial law iti intero a pagilian idi panawen ti diktadurana. Agarup P167 bilion ti tinakaw ni Marcos iti kuarta ti umili, 70,000 ti naibalud; 34,000 ti natortyur; 3,240 ti napapatay ken adu pay ti narames ken nagpukaw wenno desaparacedos. Pammaneknek ti kinaranggas ti rehimen ni Marcos ti ginasut nga umili a Kalinga a naibalud ken nalabsing ti karbenganda gapu iti panagsuppiatda iti proyekto a Chico dam a maibangon iti karayan Chico, a mangpapanaw koma iti adu a komunidad idiay Bontoc ken Kalinga manipud kadagiti ansestral a dagada.

Inikkan pay ni Marcos dagiti crony-na iti 200,000 ektarya nga ansestral a daga a kabakiran iti Abra kas konsesyon iti logging ken paper pulp para iti Cellophil Resources Corporation. Pammaneknek ti kinarungsot ti diktadura iti panagmasaker idiay Beew, Abra, ti panangpapatay ken ni Ama Macliing Dulag gapu iti panangidaulona iti panaglaban kontra iti pangipatakder ti Chico dam. Nasedsed ken agtultuloy ti operasyon ti militar idiay Cagayan Valley gapu iti panagsuppiat ti umili iti kinaranggas ti martial law. Uray ti rehiyon ti Ilocandia, a naggapuan ni Marcos, ket saan a nakaligtas iti atake ken kinarungsot ti militar.

Rekonsilasyon ken panagkaykaysa kano ti panggep ni Pres. Duterte iti panangitedna ken ni Marcos iti “hero’s burial.” Mangrubrub la ketdi daytoy iti agrisrissik a pungtotmi a biktima ti martial law tapno agbaringkuas a manggun-od iti pudno nga hustisya. Ti panangited iti hero’s burial ken ni Marcos ket kas man la panangsugat manen ken panangradrad iti asin kadagiti nagluniten a sugat..

Ti kamaudiananna, ti desisyon ti Korte Suprema ket saan a mangbaliw iti panagbuya ti umili iti pudno a pakasaritaan. Ti napateg ket no ania ti aramidentayo tapno magun-od ti hustisya, saan laeng a para kadagiti biktima no di ket agraman ti hustisya para iti umili.

Saan a bannuar ni Marcos. Ti pudno a bannuar ket dagiti umili a limmaban iti diktadura. Agtultuloy latta ti laban para iti pudno nga hustisya! #

Share

Leave a Reply