Saplit ni Lawin

Ni DONNA RABANG PETA
www.nordis.net

CONNER, Apayao — Maiyarig met laeng iti maysa a dakkel a billit (kas iti Lawin) a mangsippayot iti aniaman a kayatna a sippeten, kasta ti napasamak iti napalabas a bagyo a naawagan iti “Typhoon Lawin” wenno “Haima.” Iti sumagmamanu laeng nga oras namimpinsan nga insaplit na dagiti payak na ket dinalapus dagiti nadumaduma a lugar iti Amianan a Luzon nangruna iti Region II, Cordillera ken Ilocos.

COVERED. Farms along the Chico River in Kalinga covered with silt after typhoon battered Northern Luzon still needs to be cleared. Photo by Donna Rabang Peta
COVERED. Farms along the Chico River in Kalinga covered with silt after typhoon battered Northern Luzon still needs to be cleared. Photo by Donna Rabang Peta

Iti agdama, saan pay laeng a makalung-aw ti probinsya ti Kalinga ken Apayao gapu iti kalamidad nga impaay ti Bagyo Lawin. Nakadeklara latta dagitoy a probinsya iti ”State of Calamity.” Basar iti inisyal a datos manipud iti Provincial Risk Reduction Management Council (PDRRMC) idi October 27, adda ti kabuklan a 40,758 nga apektado a pamilya iti Probinsya ti Kalinga.

Adda met ti bilang nga 1,589 ti intero a napirdi a balbalay (totally damaged) ken 11,188 ti partially damaged. Dagiti kangrunaan a lugar a naapektaran iti kalamidad ket ti Tabuk City, a kaadwan iti naireport a napirdi a pagtaengan (667 totally damaged, 4,934 partially damaged), ti munisipyo ti Rizal (468 totally damaged, 1,802 partially damaged), ken ti munisipyo ti Pinukpuk (393 totally damaged, 3132 partially damaged). Kabayatanna minilyon met ti gatad dagiti napirdi iti benneg ti agrikultura.

Kinuna ni DRRMO Richard Anniban, “mabayag pay siguro a panawen sakbay a makarekober ti Kalinga manipud iti kalamidad nga impaay ni Lawin nangruna iti agrikultura ken imprastraktura. Ngem pagyamanan mi dagiti amin nga umili iti Kalinga gaputta alerto da.”

Adda ti naireport a walo (8) katao a natay gapu iti Bagyo a Lawin iti probinsya ti Kalinga; Balbalan -1, Lubuagan – 6, Pasil – 1. Innayon pay ni Mr. Anniban, “mas maymayat kuma no ‘zero casualty,’ ngem saan met a nalapdan ta adda latta dagiti natay.”

Kinuna pay ni Mr. Anniban nga addadan iti second phase ti relief operations, ken tuloy tuloy ti panangsimpa kadagiti pasdek kas iti kalkalsada ken rangtay a napirdi.

Iti probinsya ti Apayao, basar iti inisyal a datos naggapu iti PDDRMC (Oct. 26), adda ti kabuklan a 19,535 nga apektado a pamilya. Dagiti napirdi a babbalay; 421 totally damaged ken 11,699 partially damaged. Ti Conner, Apayao ti kaadwan a napirdi nga addaan iti bilang a 163 totally damaged ken 4,151 ti partially damaged.

Iti benneg ti agrikultura iti probinsya ti Apayao, adda 5,755 a bilang dagiti mannalon nga apektado. Iti inisyal a report adda ti kabuklan nga 13,053.79 ektarya ti naapektaran a dagdaga. Mapatta-patta nga aggatad iti P503,229,040.00 dagiti napirdi nga agrikultura kas iti pagay, mais HVCC ken livestock.

Laksid iti ahensya ti gobyerno kas ti DSWD, adda met dagiti nadumaduma nga institusyon a nangipaay iti tulong ken Relief Goods kadagiti apektado nga umili kas iti Social Action iti Apostolic Vicariate of Tabuk, dagiti Non-Government Organizations kas iti Cordillera Disaster Response and Development Services (CordisRDS). Nakasagana metten a mangidanun ti tulong ti Redemptorists Missionaries of Northern Luzon para iti panangtarimaan kadagiti nadadael a pagtaengan iti probinsya ti Kalinga ken Apayao. # nordis.net

Share

Leave a Reply