Poetry: Ala, itabonyon

Ni BRENDA SUBIDO
www.nordis.net

Ala, lualuanyon
bareng saan a marunaw
naipidas a kandila
a nangmuli iti rupa
nga agruprupsa,
tapno aglanga
a nabannuag,
natakneng
ken naemma.

Ala, lualuanyon
bareng maabsuelto
ta ‘Apo’-yo
kadagiti basbasolna
panagpapatay,
panagtakaw,
panagrames,
kinadangkok,
ken adu pay.

Ala, lualuanyon
bareng makullaapan
pudno a pasamak
pakasaritaan
a kinillo ni ‘Apo’,
inluges ti korte,
impabus-oy
ti agdama
a presidente.

Ala, itabonyon
tapno alun-onenen
dagiti igges,
arub-obenen
ti waw a daga,
agbalin a padam-eg
pakairanudan
dagiti pinaidamanna
iti gin-awa.
Ala, itabonyon
ngem iti kaanoman
saan a mapunas
iti lagip ti napalabas
pudno a pasamak
kadagiti pimmusay,
pudno a bannuar
ken naglak-am
iti kinaranggas.

Ala, itabonyon!
itabon ti bangkay
ti diktador
a gamgam
saan a bannuar
idi, itatta
ken inton kaanoman.

Ala, itabonyon!
ngem ingga’t tungpal biag
ganaben dagiti gamgam,
dangkok, kunniber
ken rinuker
ti panagramaram
gumilgil-ayab
a pungtot ti umili,
agbaringkuas,
makidangadangda
iti gagar a rumuk-at,
manggun-od
ti nainkalintegan
nga hustisya
ken pudno
a wayawaya
ken demokrasya. #

Nobiembre 25, 2016

Share

Leave a Reply