Dakami Ti Umili: Mapapigsa a panagkaykaysa iti panawen ti didigra

Ni JUDE BAGGO
www.nordis.net

Nakaro ti kasasaad dagiti mannalon tayo a nadalapus ti dua a napalabas a bagyo. Nakita tayo iti TV ken social media dagiti ritrato ti nalawa a kataltalonan a nadadael. Kasta met dagiti balbalay ken dadduma pay a sanikua nadadael gapu iti bagyo. Kas umili, dakkel ti paset tayo iti napaspas ken nabiit a panagbangon tayo manen manipud iti didigra.

Pudno a dakkel ti paset ken obligasyon ti gobyerno iti panangited iti serbisyo wenno tulong para kadagiti nakalasat iti bagyo. Rebbengen ti gobyerno iti mangisigurado nga amin a komunidad a nadalapus ti aniaman a didigra ket maikkan iti umno a tulong. Nakita tayo met ti agdama a Secretary ti Department of Social Welfare and Development a ni Judy Taguiwalo a nagrikos tapno ammuenna ti kasasaad dagiti umili kadagiti apektado a lugar.

Ngem ti dakdakkel a bileg iti dagus a panagbangon iti maysa a kalamidad ket no kasano a papigsaen ti panagkaykaysa ken kasano a palawaen ti pannakipaset ti umili iti disaster response. Iti kapadasan, no awan ti nalawa nga organisado nga umili, narigrigat a maipatungpal dagiti programa tapno makabangon dagiti komunidad.

Babaen met laeng iti napigsa ken organisado a komunidad, nalaklaka a maiyaramid dagiti disaster relief ken response. Kasta met a no organisado ti nalawa nga umili ket maisigurado ti transparency ken maliklikan ti korapsyon. Babaen met laeng iti kastoy ket maisigurado a mawarasan ken maikkan ti amin iti serbisyo wenno relief manipud iti gobyerno man wenno kadagiti pribado a relief organizations.

Iti panagbangon met laeng ti komunidad manipud iti didigra, kasapulan ti nalawa ken napigsa a panagkaykaysa ti umili. Maysa a bentahe no organisado ti komunidad ta adda panagsagana iti didigra wenno sisasagana kadagiti panawen ti didigra. Masapul a bigbigen tayo a dakkel ti panagbaliw ti klima ken dakkel ti epektona kadatayo a mannalon ken iti nalawlawa pay nga umili. No saan tayo a nakasagana kas umili, mabalin a dakkel ti epektona kadatayo.

Ngarud, kas umili, kasapulan tayo pay nga agpalawa saan laeng a para iti pudno a panagbalbaliw no di ket para pay iti disaster preparedness. No sisasagana tayo iti didigra, dakkel ti maisalbar tayo a biag, sanikua ken pangkabiagan. Daytoy met laeng ti bileg tayo no iti maysa a panawen ket awan maited ti gobyerno a tulong.

Kas umili, makipaset tayo iti disaster response. Mapan tayo kadagiti opisina a mangmangted serbisyo iti disaster relief ken operation para iti repacking ken panag-deliver kadagiti relief iti komunidad. No met nawadwad ti rekurso ket mangted tayo iti bagas, kuarta ken dadduma pay a kasapulan dagiti komunidad. Umasideg tayo kadagiti peoples organizations, maki-miembro ken makipaset. Agbalin tayo nga aktibo ken nakasagana nga agtignay para pay iti nalawlawa, panawen man ti disaster ken saan. # nordis.net

Share

Leave a Reply