Dakami Ti Umili: Balligi ti Lakbayan dagiti nailian a minorya

By JUDE BAGGO
www.nordis.net

Nakipaset tayo iti naisayangkat a Lakbayan dagiti nailian a minorya para iti bukod a pangngeddeng ken kappia a nakabasar iti hustisya manipud idi Oktubre 10-22, 2016. Dakkel daytoy a balligi ken kapadasan dagiti nainsigudan nga umili ken Moro iti lumawlawa a tignayan para iti bukod a pangngeddeng.

Dagiti nainsigudan nga umili ken Moro ket isuda ti makunkuna a national minorities wenno nailian a minorya. Dagiti nailian a minorya ket addaan agarup 15% iti pangkabuklan a populasyon ti Pilipinas. Masarakan dagitoy a nailian a minorya iti Luzon, Visayas inggana idiay Mindanao. Nu ditoy Luzon, adda dagiti katribu tayo nga Aggay, Malaweg iti Cagayan; dagiti met Igorot iti Kordilyera; Aeta iti Central Luzon; Dumagat ken Mangyan iti Southern Luzon. Dagiti met Tumanduk, Ati idiay Visayas. Idiay met Mindanao ket dagiti Lumad ken Moro. Ado pay dagiti tribu ken etnolingwistiko a grupo a saan a nadakamat. Dagitoy ti makunkuna a national minorities wenno nailian a minorya.

Gapu iti nakaro ken nadumaduma nga isyu ken problema a sagsagrapen dagiti nailian a minorya kadagiti komunidad ken ili da, napagkaykaysaan dagiti nadumaduma nga organisasyon dagiti nailian a minorya ken dagiti sumupsuporta a grupo tapno maisayangkat ti national caravan. Mayor a panggep ti Lakbayan nga ipadanon dagiti isyu ken dawat dagiti nailian a minorya iti mismo sentro ti bileg pulitika ti agdama nga estado. Maysa pay a mayor a panggep ti Lakbayan ket ti panangipalawag ken ti panawagan dagiti nailian a minorya para iti bukod pangngeddeng ken kappia basar iti hustisya.

Maysa a balligi ti Lakbayan ket ti pannakabukel ti Sandugo wenno ti tignayan para iti bukod a pangngeddeng. Istoriko ti pannakabukel ti Sandugo. Daytoy ti umuna a pormasyon ti nabukel a nagkaykaysa dagiti nailian a minorya ken Moro. Nabukel daytoy idi October 14-15, 2016 idiay University of the Philippines Diliman. Agarup amin a tribu ken etnolingwistiko a grupo iti pagilyan ket adda napili a representatibo da iti Sandugo.

Maysa pay a balligi ti Lakbayan ket ti panangidaulo ti Sandugo kadagiti nadumaduma a protesta ken piket kadagiti kompanya ti minas ken enerhiya idiay Makati kas kuma iti Lepanto, Oceana, Chevron ken SN Aboitiz. Kalpasanna dagitoy ket naisaruno dagiti kampo ti military ken ahensiya ti gobyerno kas kuma iti Camp Aguinaldo, Camp Crame, Department of Justice, National Commission on Indigenous Peoples ken kasta met ti embahada ti Estados Unidos.

Nayon pay a balligi ti Lakbayan ket dagiti nababaknang a pangkultura a pabuya manipud kadagiti delegados. Natransporma ti nabaknang a kultura dagiti nailian a minorya tapno ipakita, ipabuya ken ipadanon dagiti mensahe para iti pangkabuklan. Nausar dagiti gangsa ken dagiti pay nadumaduma a nga instrumento, kasta met dagiti kanta, sala, pattong ken dadduma pay kas porma ti protesta para iti bukod a pangngeddeng, kappia basar iti hustisya, wayawaya ken namnama.

Nu man pay nalpas ti Lakbayan idi kalman, October 27, 2016, agtultuloy latta ti tignayan dagiti nailian a minorya para iti bukod a pangngeddeng ken kappia a nakabasar iti hustisya. Kas umili, nainsigudan nga umili wenno saan, suportaran tayo daytoy a tignayan dagiti nailian a minorya. # nordis.net

Share

Leave a Reply