Dakami Ti Umili: Naim-imas koma ti packed mango no permanente dagiti mangmanged

By JUDE BAGGO
www.nordis.net

Idi adda kami idiay Davao City para iti maysa a kumperensiya, nagbirok kami ti dried ken packed mango a pampasarabomi. Gapu iti daytoy, naammuan ken nadanon tayo ti maysa a paktorya ti mangga a madama ti strike dagiti mangmanggedna.

Masarakan idiay Davao City ti Nakashin Davao International, maysa a paktorya iti panagipakete iti nadumaduma a produkto kas ti mangga. Dagitoy a produkto ket maiyexport wenno maipan iti dadduma a pagilian kas idiay Europa. Ti Nakashin factory ket maysa a kumpanya a naggapu idiay Japan.

Basar iti pannakiistorya kadagiti agarup 75 a mangmangged a naikkat wenno na-retrench iti trabahoda, adda dagiti naammuan tayo a saan a mayat a kasasaad dagiti mangmangged. Umuna, imbaga dagiti striking workers nga isuda ket napilitan nga agwelga gapu iti saan a makatao ken saan a nainkalintegan a kasasaad ken ar-aramiden ti Nakashin kadakuada. Ammoda ti mapasamak no isuda ket ag-strike, awan ti pangalaanda iti ipakanda iti pamilyada ken ti panageskwela dagiti ubbingda. Ngem kas kunada, kasapulanda nga aramiden ti rumbeng tapno marespeto ken maitandudo ti karbenganda kas mangmangged.

Kangrunaan a rason dagiti nag-strike a mangmangged ket ti saan a panagregularisa kadagiti nabayagen a mangmangged a dumanon iti siyam ken 10 a tawen nga agtrabtrabaho iti kumpanya, saan a panangited iti konsiderasyon kadagiti masikog a mangmangged, saan a panagbayad iti 3-5 a bulan a sweldo ken overtime, ababa a minutos a lunch break ken dadduma pay.

Adda ti agarup a 300 a mangmangged ti Nakashin factory. Kadagiti naikkat a mangmangged, adda dagiti nagawat iti P1,000 kas bayad ken immannugotda nga agbalin latta a contractual uray pay nabayadan iti kompanya. Dagiti saan a nangakseptar ket intuloyda ti welga.

Dagiti dawat dagiti mangmangged ket nalawag. Umuna, ti panangisubli kadagiti naikat, panangipermanente kadagiti nabayagen a contractual, longer breaks, panangited konsiderasyon kadagiti babbai nangruna dagiti masikog, ken panangbayad ti kompanya kadagiti saan a nabayadan a benepisyo ken sweldo dagiti mangmangged.

Gaput ti welga dagiti mangmangged, saan pay a nagtuloy ti operasyon ti kompanya. Pinadas ti Nakashin nga agipatakder ti run-away shop wenno ti panangipatakder iti dadduma a processing zone-da. Ngem idi naammuan dagiti mangmangged ket napanda manen binarikadaan.

Idi nangngegko dagitoy nga istorya ket kasla naikkat a dagus ti imas ti dried ken frozen mangoes. Saan kamin a gimmatang iti dried ken frozen mangoes kas panangsuporta ken panakikaykaysa kadagiti agwelwelga a mangmangged ti Nakashin. Isu a kas umili, gumatang tayo iti dried ken frozen mangoes no dagiti dawat dagiti mangmangged ket patgan ti kompanya. Narigat met laeng a matilmon ti mangga nuo ammo tayo nga adda dagiti mangmangged a saan a mangmangan gapu iti panangilabanda iti karbengan ken benepisyo da. Kas umili, suportaran tayo dagiti mangmangged ti Nakashin. Nainkalintegan ken husto ti ilablabanda. Agbiag dagiti mangmangged ti Nakashin. # nordis.net

Share

Leave a Reply