Oplan Bayanihan agresibo a panagpa-surender kadagiti sibilyan iti Kalinga

Ni JPAK (PR)
www.nordis.net

TABUK CITY — Ti Bayanihan iti Kalinga ket aw-awagan da nga Angkas/papppango/Innabuyog. Saan a mangted iti saan a pagkikinna-awatan iti ili. Iti las-ud ti sangapulo (10) a bulan a nagyanan ti Peace and Development Team (PDT) ti 503rd Brigade ti Philippine Army idiay barangay Western Uma, Lubuagan, nangkiwar laeng iti naregta a nainsigudan nga urnos ti umili ti naipaay da.

Adu a panaglabsing iti karbengan tao ken kas nainsigudan nga umili ti napaspasamak manipud simrek dagitoy iti ili manipud October 2015 inggana iti agdama. Adda dagiti kaso a saan a panagkikinna-awatan dagiti bumalay/pamilya a makibalayan dagiti soldado ken ti nakaro ket saanen nga agkikinna-awatan dagiti agkaka-arruba ken iti ili mismo. Kas iti gagangay a wagas ti Civilian Military Operation (CMO), tinawid ti PDT ti agtultuloy a panagpasugal, panagpapainom ken dadduma pay.

Si-aammo ti AFP nga iparparit ti International Humanitarian Law – wenno Law of Armed Conflict – ti panagkampo dagiti soldados iti uneg ti ili wenno aniaman a nagbalayan dagiti sibilyan ken ti paglintegan ti United Nations Declaration on the Rights of Indigenous People (UNDRIP) kas nainsigudan nga umili ngem saan da latta tungpalen dagitoy.

Idi July 2016, agarup 69 ti inawis ken nailista ti nasao a PDT iti tallo a barangay ti tribu ti Uma (Western Uma, Upper Uma ken Lower Uma) kas surrenderee ken recruit da a CAFGU. Adda payen Taga Western Uma a nailista da nga ipapa-ayab da idiay 503rd Brigade tapno ipadalos ti nagan da.

Dagitoy ket sibilyan nga inallilaw da babaen iti panangi-kari a maka-ala da iti livelihood project ken maala dan to kas regular nga army nu ag-surrender ken ag-CAFGU da. Na-obliga da pay a mangi-surrender kadagiti daan ken nababa a kalibre a paltog kas iti carbine, spring field, cal. 38 pistol kas pampaneknek da kas milisyang bayan da.

Idiay Guinaang, Pasil – pito nga opisyales ken miembros ti IFAGPI agraman ti barangay Captain ti Guinaang proper ti impaayab dagiti Philippine Army idiay 503rd brigade idiay Calanan, Tabuk City tapno ag-surrender ngem lima laeng kadagitoy ti napan ken impadalos da ti nagnagan da. Uray Idiay Poswoy, Balbalan – addan dagiti inlista da a mapaayaban tapno mapan da agpadalos met laeng.

Segun kadagiti umili kadagitoy a luglugar, Amin dagiti nailista ken papaayaban ti 503rd Brigade a mapan agpadalos iti nagnagan da ket dagiti opisyales ken miembros dagiti People’s Organization, barangay officials ken dagiti dati a kameng ti New People’s Army (NPA) a nabayagen a nag-surrender wenno nai-clear ti nagnagan da idi panawen a bimmaba da. ti agdama, agtultuloy ti operasyon militar kadagiti sulsulinek nga il-ili iti Kalinga iti laksid ti kalikagom ni president Rodrigo Duterte para iti kapia a tungtongan wenno Peace Talk.

Amin dagitoy ket kunkundenaren ti Justice and Peace Advocates of Kalinga (JPAK) ken Cordillera People’s Alliance – Kalinga Chapter gaputa nalawag a pananglabsing iti kalintegan ken karbengan tao. Saan nga inayon dagiti sibilyan iti panangparmek iti insurhensya. # nordis.net

Share

Leave a Reply