Naballigi a workshop iti kultura

Ni TADEK MOUNTAIN PROVINCE (PR)
www.nordis.net

SAGADA, Mountain Province — Naballigi a naisayangkat ti Pasnaan iti Kultura sadiay opisina ti Montañosa Research and Development Center (MRDC) iti Makamkamlis, Poblacion, ditoy Sagada idi Hulyo 28-30, 2016.

Indauluan daytoy dagiti miembro ken opisyales ti Tignayan dagiti Agtutubo para iti Demokrasya ken Kultura (TADEK) ken babaen iti tulong ti National Commission on Culture and Arts (NCCA).

Agarup 25 a kabataan ti nagpartisipar ditoy a workshop a naggapu iti nadumaduma a munisipyo ti probinsya.

Ub-ubbo, tagowentako nan gawis ay kultura di Montañosa (Agtitinnulongtayo, riingen ken biagen tayo ti mayat a kultura ti Montañosa), daytoy ti tema ti pasnaan. “Ti pangkabuklan a panggep tayo ket ti panangurnos, panangingato ken panagkaykaysa dagiti kabataan iti turongen ken kinapateg ti kultural a pamuspusan para iti panangriing, panangorganisa ken panangmobilisa kadagiti kabataan iti uneg ken ruar ti eskwelaan,” kinuna ni Reman Pangdao Dazon, chairman ti TADEK.

Babaen iti daytoy a pasnaan, dagiti nagpartisipar ket nakabukel iti script a mabalin a maipabuya kadagiti eskwelaan ken komunidad.

“Ti kultura ti Kordilyera ken ti probinsya ti Montañosa ket inlaban, inaywanan, sinalakniban dagiti apo tayo para iti sumaruno a kaputotan,” daytoy ti panangiladawan ti maysa a facilitador iti pasnaan.

Saludsod dagiti nagpartisipar no kasano ti kultura itatta ta in-inut metten ti panagbaliw dagiti nainsigudan a kultura ken ugali tayo. Insungbat ti maysa a facilitador a daytoy a panagbaliw ti kultura ken ugali tayo ket gapu iti panagserrek dagiti nadumaduma a kultura manipud kadagiti sabali a pagilian, panagserrek ti nadumaduma a sekta ken dadduma a nasyon a ti epekto dayoty iti kabataan ken uray kadagiti nataenganen ket mangulaw, mangbaliw, mangburak ken mangiturong kadakuada iti sabali a kultura ken ugali.

Nagbibinninglay ken nagiinnadal met dagiti kabataan iti epekto ti implementasyon ti K12 ken Asean Free Trade Area (AFTA).

Gapu iti uppat nga aldaw a pasnaan, nakaputar dagiti nakipasnaan kadagiti kanta ken script a maipabuya basar iti pudno a paspasamak iti lokalidad ken kasasaad dagiti kabataan.

Inyunay-unay pay ni Dazon a napateg ken masapul a salakniban, pagtalinaeden dagiti nasayaat a paset ti kultura ken ug-ugali, kasta met a baliwan dagiti saanen nga umannatop a kultura ken ugali. Masapul a naregta tayo a mangsalaknib iti kultura para iti daga, biag, kinabaknang ken iti bukod a pangngeddeng. # nordis.net

Share

Leave a Reply