Makan a la Pinoy: Binubodan

Ni BRENDA S. DACPANO
www.nordis.net

Ti binubódan ket nayadi nga innapuy a popular kadagiti Pangasinense ken Ilocano. Manipud iti sao a bubod wenno yeast.

Binubodan. Photo by Brenda S. Dacpano
Binubodan. Photo by Brenda S. Dacpano

Ti binubódan ket umuna a tukad iti panagaramid iti tapuy wenno agrugi pay laeng nga agbalin nga arak ti mayadyadi nga innapuy tapno agbalin a tapuy. Popular ti tapuy iti Kordilyera. Iti Pangasinan, exotic a makan ti binubódan wenno binubúran iti pagsasao a Pangasinan. Kasapulan laeng a nakairuaman daytoy a kanen tapno maapresiar ti ramanna a nasam-it a medyo umalsem nga agat-arak. Saan laeng nga innapuy wenno diket ti mabalin nga aramiden a binubódan, mabalin met ti kamoteng kahoy wenno balinghoy. Kas kadagiti dadduma a taraon nga adda arakna, tanangen laeng ti pannangan iti binubódan ta makabartek no makaadau ken saan a nakairuaman.

Ramen ti binubódan:

½ kilo a diket
½ bubod, napulbos

Pangdigo iti binubódan:

2 kutsara a repinado (asukar a puraw) a naikanaw iti 2 baso a nalamiis a danum

Panangisagana:

1. Iluto ti diket a kasla panangiluto iti ordinaryo nga innapuy.

2. Ipidas ti innapuy iti bigao tapno bumaaw bassit. Iwarakiwak ti kaguddua iti napulbos a bubod iti naipidas nga innapuy. Kiwaren daytoy ken ipidas manen santo iwarakiwak ti nabati a napulbos a bubod.

3. Ikabil iti dakkel a garapon, ceramic pot, kardero wenno aniaman a nadalus a pagikkan nga adda kalubna. Kaluban. Mabalin met nga agusar ti bulong ti saba a nailanat tapno nabangbanglo. Ikalub ti bulong ti saba sakbay nga kelleban ti garapon.

4. Idulin iti namaga a lugar. Mayadi ken mabalinen a binubódan iti 2-3 nga aldaw iti nalamiis a lugar ken 1-2 nga aldaw iti napudot a lugar.

5. Kanawen ti pangdigo iti binubódan. Ibukbok daytoy iti binubudan.

6. Naim-imas ti binubódan no maipalamiis iti refrigerator. # nordis.net

Share

Leave a Reply