Makan a la Pinoy: Palitaw / Inandila / Dila-dila

Ni BRENDA S. DACPANO
www.nordis.net

Naglutoak ti palitaw wenno dila-dila gapu ta makaramramanak ti inandila ti Kalinga ngem masulitakon a mangiluto iti estilo ti Kalinga nga ibalkot pay iti bulong ti saba ken iluto a kasla suman.

DILA-DILA iti sinam-it, sininglag ken ladek. Photo by Brenda S. Dacpano
DILA-DILA iti sinam-it, sininglag ken ladek. Photo by Brenda S. Dacpano

Adda sabali ken naimas a nanam ti binalkot iti bulong ti saba. Pangmabiitan ti inaramidkon. Nagpagatangak laengen ti ladek idiay Tabuk ta adu ti magatang iti tiendaanda tapno saankon nga agsinglag pay. Kas gagangay nga aramidko, sadinno man nga ili ti papanak ket pasiarek ti tiendaan wenno public market-da a kas paniripan iti kultura ti maysa nga ili. Idi naudi a pasiarko sadiay, napanak iti tiendaanda ket nagadu ti aglaklako iti ladek, maysa lemon a ladek ti ginatang ko ken kaguddua bay-on ti impaaramid ko nga inandila.

Ramen ti dila-dila

2 tasa nga arina a diket wenno tapong/galapong
1 tasa a danum
1 kutsarita nga asin
½ tasa asukar a puraw (optional)
Ramen ti sinam-it/syrup:
1 tasa asukar a brown wenno tagapulot
1 tasa a danum
½ tasa a sininglag
1 tasa a ladek

Panangisagana

1. Paglaoken ti ramen ti dila-dila. Mabalin a laokan daytoy ti asukar ngem mayat latta uray awan ti asukar na ta maiyaramidan met laeng iti sinam-it a nga addaan ladek ken sininglag. Bay-an a mauper ti tapong iti agarup 20 minutos.

3. Iti dakkel a kaserola wenno pariok, agpaburek iti kalalainganna a danum a pangilutuan iti tapong.

2. Bayat nga ur-urayen nga agburek ti danum, isagana ti sinam-it: Iti sabali a kaserola, paglaoken amin a ramen ti sinam-it, ipaburek agingga marunaw ti asukar. No nasayaw unay, ipaburek pay aginggana pumalet bassit. Iddepen ti apuy ken ipaigid pay.

4. Pormaen ti tapong iti sinandila, ipisok iti agburburek a danum ti pasaray lima a pidaso wenno ‘tay saan nga aglulubbon unay tapno saan nga agdedekket. No timpawen, naluton. Adawen ken paik-ikan. Itabsaw daytoy iti sinam-it santo ikabil iti pangidasaran a pinggan. Uliten daytoy agingga maluto amin ti dila-dila.

5. Parabawan ti ladek. Idasar a napudot. # nordis.net

Share

Leave a Reply

This site uses Akismet to reduce spam. Learn how your comment data is processed.