Moratorium ti panagbayad ti utang ken abbang dawat dagiti mannalon

By KYLE EDWARD FRANCISCO
www.nordis.net

VIGAN, Ilocos Sur — Kiniddaw ti militante a Solidarity of Peasants Against Exploitation (STOP Exploitation) ti interbensyon dagiti lokal a gobyerno para iti panangipatungpal ti temporario a panangipasardeng ti panagbayad ti abbang ti daga ken utang dagiti mannalon. Inayon pay ti grupo a nasken a mangilatang ti gobierno ti pondo para iti subsidiyo iti kasapulan a ramit ken inputs dagiti mannalon.

“Napateg ti direkta nga interbensyon dagiti lokal nga opisyales tayo iti moratorium ti panagbayad ti abbang ken utang dagiti kakabsat tayo a pesante tapno maiikanda ti gundaway a makalung-aw manipud ti nagsasaruno a didigra ken panagatake ti peste a sinagrap ti rehiyon,” kuna ni Zaldy Alfiler, Pangkabukalan a Sekretaryo ti grupo.

Tallo a napipigsa a bagyo ti limmabas ti rehiyon manipud Hulyo inggana Oktubre. Nagdeklara ti State of Calamity ti La Union idi Hulyo gapu kenni Bagyo Egay a nanglayus ti 11 a munisipyo ken ti Syudad ti San Fernando, ken P143.08 milyon a nadadael a sanikua ken agrikultura. Dumanon P59 milyon a balor ti agrikultura ti pinerdi ni Bagyo Ineng ti Ilocos Norte a nagdeklara ti State of Calamity bayat ti panaglabas ti bagyo. Karaman ti nasao a naperdi ti P52 milyon a balor ti pagay, P3.7 milyon a gatad ti lames ken P2 milyon a dingoen. Nasurok P5 milyon met ti sinagrap ti Ilocos Sur a dadael ti agrikultura. Iti kalablabas a Bagyo Ineng, agbalor ti P65 milyon ti nadadael ti Ilocos Norte, umagarup P14 milyon ti Ilocos Sur iti benneg ti agrikultura.

Kalaksidan iti bagyo, nagsagrap pay dagiti probinsya ti rehiyon ti nakaro a tikag ken peste. Nakurang a 700 nga ektarya ti dinadael ti tikag iti Ilocos Norte. Dumanon met ti 44,000 nga ektarya ti inarak ti peste iti 17 a munisipyo ti Ilocos Sur.

Idurduron ti STOP Exploitation ti panangilatang dagiti lokal a gobierno ti pondo manipud ti bingayda iti RA 7171 a maited kadagiti mannalon a nadidigra tapno adda ti rugi a kapital a mausarda. Kasilpo iti nasao a singasing ti panangted prioridad dagiti kooperatiba a bangko ti rehiyon a pautangan dagiti biktima ti bagyo ken peste nga awan ti interest na.

“Ti nagdakkel a pondo dagiti lokal a gobierno nga agtataud ti RA 7171 ket naggapu ti ling et ken sakripisyo dagiti mannalon isunga rumbeng a dagus ken sibubukel koma a mapagserbi daytoy kanyada aglalo itatta a palalo nga agkasapulanda,” nayon ni Alfiler.

Innayon pay ti lider ti grupo a dagus koma nga iproseson dagiti cooperative bank kadagiti probinsya dagiti aplikasyon ti babassit a mannalon iti utang nga awan interes. Kinuna na nga idi Setiembre 30 ket inyawat ti Departamento ti Agrikultura ti P50 milyon iti tallo a kooperatiba iti rehiyon. Nakaawat ti sag-P20 milyon ti Cooperative Bank of Ilocos Norte ken Ilocos Sur Cooperative Bank. Bayat a P10 milyon met ti naited ti La Union Cooperative Bank.

“Kuarta ti umili ti naiyawat kadagiti kooperatiba isunga rumbeng laeng a mapagserbi daytoy kadagiti umili nga agkasapulan nga awan ti nayon a padagsen kas ti interes aglalo ti kasasaad a nadididgra dagiti kakabsat tayo a mannalon,” palawag ni Alfiler.

Paset dagiti nasao a kadawatan iti idatdatag ti STOP Exploitation kadagiti kandidato iti umay nga eleksyon intun Mayo 2016. Pagrukudan ti kinapudno nga agserbi dagiti opisyales ti panangsuporta ken panangipatungpal kadagiti naidatag a kadawatan, kuna ti grupo. # nordis.net

Share

Leave a Reply