Makan a la Pinoy: Tinola a pampano

Ni BRENDA S. DACPANO
www.nordis.net

Idi, kunak no manok laeng ti mabalin nga itinola. Bayat a lumawlawa iti exposure iti kultura, umad-adu met dagiti mataktakuatan ken maad-adal maipanggep iti kultura. Umad-adu pay dagiti maramramanan a taraon a saan a kadawyan kaniak.

2015_1004makanTi tinola iti kaubingko ket ‘tay laeng native a manok a nalaokan ti bulong ti marunggay ken bunga ti papaya a naganus, no dadduma ket bulong ti paria ti mailaok. Metikulosa unay daydi apong ko a baket ta native a manok laeng ti kayatna a sidaen, uray nauso idin dagiti 45 days a manok. Radradanna pay iti asin tapno maikkat kano ti langsina. Ilutona iti dalikan, saanna a kayat iti gas stove ta saan kano a naimas ti mailuto ditoy.

Mabalin met gayam nga itinola ti ikan wenno lames kas ti pampano (apahan, damis lawin, pomfret). Mayat met nga itinola dagiti dadakkel a lapu-lapu, malaga wenno sapsap ngem nangina, P280-350 ti maysa a kilo. Agbalor ti P220-280 kada kilo ti presko a pampano depende iti kadakkelna. No orderen iti restaurant, agbalor iti P500-600 kada kaguddua a kilo.

Pasaray maysa a kilo ti maysa nga order, isu nga agarup P1200 ti kada order a nailuton a tinola wenno sweet-sour. Mabalin met nga itinola ti daddakkel a salaysalay (apahay, scad) wenno hasa-hasa (short-bodied mackerel), tilapia wenno bangus, naimas met laeng nupay nalaklaka. Kasta met a naimas a malaokan ti bulong ti paria a nakamatisan wenno liningta.

Ti sekreto iti naimas a tinola ket ti mailaok a baraniw. Tadtaden ti naganus a parte ti baraniw wenno ‘tay bugasna, isu ti ilaok nga igisa kagiddan ti laya ken sibuyas.

Ramen:

½ – ¾ kilo a pampano (1-2 pidaso)
1 kutsara a mantika
3 baraniw (naganus a paset), tinadtad
1 pulgada a laya, pinitpit wenno naiwa iti naingpis
1 sibuyas, naiwa iti naingpis
1 bassit a naganus a bunga ti papaya
5 ungkay a bulong ti marunggay wenno bulong ti sili
Patis ken paminta a pangtimpla

Preparasyon:

1. Isiksikan ti pampano, bugguan ken gudduaen no dakkel unay. Paik-ikan.

2. Ukisan ti papaya ken kirkiran nga ikkaten dagiti naganus a bukelna, aramiden daytoy tapno saan a napait. Iwaen iti pakuadrado, agarup dua pulgada. Ipaigid pay.

3. Iti kaserola, igisa ti baraniw, laya ken sibuyas iti maysa kutsara a mantika. No limmamuyoten ti sibuyas ken baraniw, bukbukan ti 1 ½ – 2 litro a danum ken ilaok ti papaya. Timplaan iti patis ken paminta. Kaluban ken pagbureken aginggana half-cooked ti papaya.

4. Ikabil ti pampano, pagbureken iti walo a minutos.

5. Ipisok dagiti bulbulong.

6. Idasar a napudot. # nordis.net

Share

Leave a Reply