Maikapat a kongreso ti Ilocos Human Rights Alliance, balligi!

ni KYLE EDWARD FRANCISCO
www.nordis.net

STO. TOMAS, La Union — Balligi a naisayangkat ti maika-uppat a kongreso ti Ilocos Human Rights Alliance (IHRA) a dinarayan ti 100 a delegado manipud iti probinsya ti Ilocos Norte, Ilocos Sur ken La Union idi Abril 30 inggana Mayo 1. Naiyaramid ti nasao nga aktibidad iti CONDORA Training Center ti United Church of Christ in the Philippines idiay Damortis, Sto. Tomas, La Union. Ti panangpapigsa ti alyansa babaen ti konsolidasyon ken panangpalawa iti miembro ti kangrunaan a talmeg ti kongreso. Naudi a naiyaramid ti kongreso ti organisasyon idi 2010.

Innadal ti Pangtao a Karbengan

Imbingay ni Ofel Beltran manipud ti National Office ti KARAPATAN ti kasasaad ti pangtao a karbengan iti uneg ti gobierno ni Benigno Aquino III. Impresintar ni Beltran ti umadaddu ken kumarkaro a panangiyablat ti ranggas ni Aquino kadagiti umili a mangilablaban kadagiti nainkalintegan a kadawatan kas ti pudno a reporma ti daga, panangipangato ti sueldo ken dagiti mangsalsalaknib ti aglawlaw ken pangkabiagan. Imbaga pay ti ispiker a dandanin a martapan ni Aquino ti bilang ti kaso ti pangtao a karbengan idi panawen ni Gloria Arroyo.

Kastamet nga inyunay-unay ni Beltran a napateg ti panagkaykaysa tapno irupir ti pangtao a karbengan.

Ti usto a panangbuya ken pannirigan ti nailian demokratiko a tignayan iti pangtao karbengan ti simmaruno a naadal babaen ti panangibingay ni Ms. Imelda Tabiando ti Cordillera Human Rights Alliance. Tinalantan ni Tabiando ti pakaistoryaan nu kasano a nabukel ti konsepto ti pangtao a karbengan. Tinalmegan ti diskusyon ti naindasigan a panangbuya ti pangtao a karbengan ken ania dagiti kamali a pammati nga iwarwaragawag dagiti naduma-duma a grupo, institusyon ken gobierno mainaig kadagitoy a karbengan.

Kinuna ni Tabiando a ti Universal Declaration of Human Rights a binukel ti United Nations ket mangikedkeddeng laeng kadagiti minimum nga istandard ken nakatalmeg iti sibil ken politikal a karbengan. Kastamet a dagitoy ket nakasilpo iti indibidwalista a kapununutan ken panangipasaknap ti pribado a panagsanikua. Impaganetget pay ti ispiker nga awan ti kinapudno ti ibagbaga ti UN a panagpapadapada ken unibersalidad ti pangtao a karbengan gaputa ti pannakaipatungpal daytoy ket nakabasar nu siasino ti akin iggem ti bileg pampolitika. Dinakamat na a pangarig ti kasasaad dagiti ordinaryo a balud ken dagiti balud a pulitikal kumpara iti ispesyal a pagbaludan ken panangasikaso kadagiti politiko ken indibidwal a nangibulsa iti pork barrel.

Panangpapigsa ti IHRA

Nangted ti report ti naaramidan ti IHRA iti uneg ti nasurok uppat a tawen ti Regional Secretariat. Nabinsa-binsa iti report nu kasano a narimbawan ti IHRA dagiti nagtaud a problema kas ti pannakabakante dagiti mano a posisyon iti Executive Committee, kinakurang iti istap, pinansya ken dadduma pay. Naipakita ti adu a tinameng ti IHRA a kaso panaglabsing ti pangtao a karbengan, dagiti naipapanawen a panagresponde kadagiti pasamak ken trabaho ti organisasyon ti intar dagiti abogado.

Nagkaykaysa ti assembleya nga iti kabuklan ket adu ti naaramid ken balligi a nagun-od ti IHRA numanpay dakdakkel koma pay ti mabalin a naaramidan nu saan a timaud dagiti nadakamat a problema ken pagkurangan.

Sangsangkamaysa met lang nga inaprubaran dagiti delegado ti rekomendasyon ti regional secretariat a matalmegan iti panangbukel ti plano nu kasano a mapapigsa ken mapangato pay ti kabaelan ti alyansa a mangipatungpal ti rebbengen na.

Kalpasan ti report ket naiyaramid ti workshop dagiti probinsya tapno itudo dagiti kangrunaan nga isyu a sangsangoen iti probinsya mainaig ti pangtao a karbengan ken ania dagiti maisayangkat nga addang tapno naananay a masango dagitoy. Natalmegan iti workshop ti panangiplano dagiti probinsya ti panangibangon ti tsapter ti IHRA iti Ilocos Sur ken Ilocos Norte, ken ti panangpalawa ti La Union Peace and Justice Advocates.

Maysa kadagiti kangrunaan a dinawat dagiti delegado ti pannakaisayangkat ti treyning iti paralegal ken adaddu pay a materyales para iti pangisayangkat ti innadal iti tukad munisipyo ken komunidad. Nagkaykaysa pay iti workshop nga ibangon dagiti human rights committee kadagiti organisasyon ken human rights desk kadagiti komunidad.

Baro nga Opisyales, Baro a Karit

Naisayangkat ti panagbotos ti baro nga opisyales ti IHRA.

Nabotosan dagiti sumaganad nga agtakem kas Executive Committee ti alyansa iti las-ud ti dua a tawen – Rev. Fr. Saranay Respicio kas Chairpersonn, ni Rev. Ptr. Leo Mateo a Vice Chairperson, Ma. Zoilo Baladad ti Secretary General, Mary Ann Gabayan kas Deputy Secretary General, Rev. Ptr. Jaypee Bulusan ti Treasurer ken ni Mila Marcelo ti Auditor.

Nagsapata dagiti baro nga opisyal ti IHRA iti sanguanan ti umili bayat iti programa a naisayngkat iti Plaza ti Siudad ti San Fernando a paset ti selebrasyon ti Mayo Uno.# nordis.net

Share

Leave a Reply

This site uses Akismet to reduce spam. Learn how your comment data is processed.