Konsultasyon dagiti agmamais, naisayangkat

By APIT TAKO (PR)

BAGUIO CITY — Maysa a konsultasyon dagiti agmulmula ti mais ti naangay idiay Paracelis, Mountain Province idi Pebrero 27 a dinar-ayan dagiti naggapu iti nadumaduma a lugar ken pati pay dagiti kameng ti grupo dagiti mannalon ken organisasyon.

Dagiti organisasyon a nakipaset iti konsultasyon ket ti Alyansa dagiti Pesante ti probinsiya kas iti Ifugao Peoples Movement (IPM) ken Alyansa dagiti pesante ti Montanyosa (ApitMon), Alyansa dagiti Pesante iti Taeng Kordilyera (ApitTako) ken dagiti representatibo dagiti nainsigudan nga umili. Dimmar-ay pay dagiti local government units (LGUs) ti Paracelis.

Addaan panggep ti nasao a konsultasyon a mabukel ti Adhoc kas panagsagana iti pangipatakder ti maysa a pederasyon dagiti organisasyon dagiti agmamais. Daytoy ket tapno adadda a mapatibker ti organisasyon dagiti agmamais.

Nailanad ti usto a kasasaad pang-ekonomya dagiti mannalon ken napagkaykaysaan da dagiti pamay-an a maresolba ti agdama a problema dagiti agmamais. Iti panagbinningay, naidatag ti kasasaad a nakaro ti panakagundaway ken panakaparigat dagiti nakurapay a mannalon ti mais nga addaan agarup 80% to 90% a populasyon, gapu iti nangato a presyo a mainayon (30%) kadagiti tagilako a mausar iti panagmula inggana panagburas ti mais kas iti abono, pestisidyo, herbicides, ken sako. Nangato nga interes (30% inggana 60%) iti utang ti bakbaklayen dagiti mannalon ti mais. Nailanad pay a kontrol dagiti supplier ken financier ti market ken transportasyon ken idikta da ti presyo iti nakababbaba gapu ta diay suki da a buyer ti pangilakuanda uray adda ti sabali a buyer a mangala iti nangatngato a presyo.

Segun kenni ni Leonard Maklininga, representatibo ti LGU, adda kano met naitulong ti gubyerno kadagiti nakukurapay a mannalon ti mais. Kuna na a nagited ken nagwaras da iti bukel wenno bin-i. Ngem kuna met dagiti nangimula a manmano (2 inggana 4 ti nagtubo iti 10 a bukel )ti nagtubo, sayang ti gastos ken bannog ken nautangan da pay iti pinang-abono.

Nabukel dagiti nakidar-ay ti organisasyon dagiti agmamais tapno adda ti mangiduron kadagiti dawat da nga ibaba ti nagato unay a nayon a presyo ken interes ti pautang dagiti financiers ken suppliers. Dawat da pay nga ingato ti presyo ti mais tapno maibatog iti kinangina ti inputs a mausar iti produksiyon ti mais. Kidkiddawen pay dagiti mannalon iti gubyerno ti subsidiyo para kadakuada tapno mapaado ti makan a kasapulan dagiti nakurapay nga umili. # nordis.net

Share

Leave a Reply