Makan a la Pinoy: Paksiw a labahita ken pananglagip iti kaubingko

Ni BRENDA S. DACPANO
www.nordis.net

Linikmotkon ti tiendaan ti syudad ti Baguio ngem awan ti mabirokak a labahita (acanthuridae/surgeon fish). Iti mano a tawenkon nga agnanaed ditoy, awan pay ti nakitak no di dagiti fillet a labahita ngem saan a kas iti birbirokek a tipo. Makaramanak laeng ti paksiw a labahita no agawidak idiay ilimi nga Urdaneta. Daytoy ti paboritomi ken ni manang ko nga Alice sipud kaubingmi.   

MARTY MACARAEG. Photo ni Brenda S. Dacpano
MARTY MACARAEG. Photo ni Brenda S. Dacpano
Iti maysa a panagawid ko, manipud iti paksiw a labahita, sinublianmi ken ni manangko ti naragsak ken napnuan maris a kinaubingmi nupay simple ken napanglaw. Dagiti panagala ti bennek iti Macalong River. Ti panagulimi ti bayabas ti kaarruba sakaminto agtataray no binugkawanda kami ni Lakay Domagas nga akinmula, kasla kami masikog ti kinaadun ti naisukibot a bayabas iti badomi. Dagiti panagtuno ti dudon idiay taltalon ken panaglubi ti kamoteng kahoy sakbay iti panagay-ayam ti San Pedro (patintero) wenno linnemmengan kadagiti nasellag a rabii.

Ngem sabalin ti panawen itatta, modernon ti teknolohiya, iyorder mo laengen iti restaurant dagiti kayat mo a kanen ken adda pay free home delivery. Mabalinen a magatang amin dagiti gustustom a kanen. Ngem para kaniak, awan ti makaatiw iti lutong-bahay ken ni kaano man, saan mo a magatang dagiti kapadasan ken lagip a kakuyog ti pannakapartuat dagitoy a taraon.

Itay nabiit, naistorya ti kabsatko kaniak a naimas kano ti luto a paksiw a labahita ti gayyemna ken batchmate na idi highschool a ni Marty Macaraeg.  Dinamag ko no mabalin nga ipablaak ditoy a pagiwarnak ket pinatganna tayo met ti gayyemna.  Kinuna ni Marty a simple ken nalaka laeng a lutuen ti paksiw a labahita. “Mabiit laeng nga ipaburek tapno saan a maderder,” kinuna na. Sinaludsod ko no adda kadi sekreto a ramen ti paksiw na, awan kano no di ti gagangay a ramen ti paksiw: suka, asin, laya, sili a pangpaksiw, sibuyas, paminta ken sangapirit nga asukar. Mayap-ap iti kaserola dagiti laya, bawang ken sibuyas santo ikabil dagiti nagerret a labahita. Apayso a naimas ti lutona – husto laeng ti alsem ken apgadna ken kumagat bassit ti gasang ti sili. Mamatiak a no adda panagayat mo iti aniaman nga ar-aramidem ket makita iti resulta a produkto daytoy.   

Ni Marty ket nagturpos iti kina-arkitekto ken artist iti Clan Printing & Sportswear idiay Bayaoas, Urdaneta City. Kas iti art a masapul ti panagtutunos dagiti agduduma a maris iti panagpinta, ti panagluto ket rumbeng a natimbeng dagiti agduduma a raman – apgad, alsem, gasang ken sam-it; kasta met a balansyado dagiti texture ken buya tapno kaay-ayo iti dila ken iti mata. Adun dagiti lallaki a cook/chef a rumukruk-at iti de-kahon a kapanunotan a para kadagiti babbae laeng ti panagluto. Kas met iti umad-adu a bilang dagiti babbae nga agtrabtrabaho kadagiti sigud nga ar-aramiden laeng dagiti lallaki. Dayawek dagiti lallaki a saan a mangipaidam ti kaammuanda para iti panangpadur-as ti pamilya ken gimong  – panagpinta, panagkarpintero man wenno panagluto. # nordis.net

Share
« «  Nordis-On-Air: Oct 6   |   Kuribot ken Wang-it  » »

Leave a Reply