Makan a la Pinoy: Organic a makan iti Azotea Greens

Ni BRENDA S. DACPANO
www.nordis.net

Adu dagiti naintar a panganan iti Session Road, nadumaduma a pagpilian depende iti pakailiwan a makan. Itay laeng nabiit a natakuatak ti Azotea Greens nga inrekomenda ti maysa a gayyem. Naidumduma daytoy kadagiti dadduma a panganan ta vegan-friendly.

AZOTEA GREEN SALAD. Photo by Brenda S. Dacpano
Idi laeng Agosto a naglukat daytoy a restaurant iti akinbaba a kadsaaran ti pasdek ti La Azotea Building iti Session Road. Sigud nga adda iti maikadua a kadsaaran ti pasdek ngem immakarda iti nalawlawa ngem naim-imeng a lugar iti baba. Pudno a namayengmeng daytoy, makapaawis a pagistambayan dagiti barkada. Adu dagiti paintings a nayarkos kadagiti diding ken nasilawan kadagiti LED.

Agiserserbida kadagiti organic a natnateng ken aggapgapu iti bukodda nga hardin ti dadduma. Pinadasko ti Azotea salad greens a nalaokan ti vinaigraitte, adda pagpilian a tofu mango sauce ken mustard sauce. Nagpresko dagiti nateng ken mayat ti presentasyon dagiti laokna a babassit a patatas a naipatulid iti basil pesto. Nagrinnanudmi daytoy iti kaduak a gayyemko ken ti inorder na met a potato cheese soup. Pinangbulonmi ti fruit fusion shake a papaya, saba ken laranghita.

Adda pay iti menu da ti tinuktok a tofu, tofu a nabalkot iti nori ken nailuto iti getta ti niog. Mairekomenda met a padasen ti sisig nga uong ken crispy kangkong iti tofu mango sauce. Agserserbida met ti whole day breakfast manipud iti 6:30 iti agsapa aginggana 9:00 iti rabii. # nordis.net

Share

Leave a Reply