Makan a la Pinoy: Lettuce wrap

Ni BRENDA S. DACPANO

Ti lettuce wrap ket maysa kadagiti adu a makan a maidasdasar iti panangselebrar ti Chinese New Year. Segun iti pagsasao a Cantonese, ti lettuce wrap ket maibalikas a kas ti panagdur-as ti masakbayan isu a kadawyan daytoy a maidasar iti baro a tawen.


Photo by Brenda S. Dacpano

Dagiti maikabil a natnateng ditoy ket segun iti adda iti panawen. Mabalin nga agusar ti bitswelas, cauliflower, carrots, kdpy. Mabalin met a laukan ti tofu wenno tokwa imbes a manok para kadagiti vegetarian.

Ramen

1 nga ulo ti litsugas, iceberg wenno romaine
1 kutsara a sesame oil
1 pulgada a laya, tinadtad
2 ngipen a bawang, tinadtad
2 bulong ti sibuyas
1/2 kilo a barukong ti manok, naiwa a pakwadrado
2 nalabaga a bell pepper, naiwa a pakwadrado
1 lata a water chestnuts
1 ungkay ti celery, naiwa iti guddua pulgada
1 kutsara a soy sauce
2 kutsara nga oyster sauce
1 kutsara a cooking wine
1 kutsarita nga asukar
asin ken paminta a pangtimpla
1 kutsarita a gawgaw a naikanaw iti
2 kutsara a danum

Preparasyon

1. Pagsisinaen dagiti bulong ti litsugas. Ugasan ken paik-ikan.

2. Iti dakkel a pariok, ipapudot ti sesame oil. Igisa ti bawang, laya ken sibuyas. Inayon nga igisa ti manok agingga ag-brown bassit.

3. Ilaok nga iluto dagiti water chestnuts ken nalabaga a sili.

4. Inayon ditoy dagiti nabati a ramen malaksid iti litsugas. Kiwaren ken iluto iti kalalaingan na a pudot iti 8-10 a minutos. Adawen ken pabaawan.

5. Mangikabil ti sanga-kutsara a ginisa iti bulong ti litsugas. Kanen a kasla taco. #

Share

Leave a Reply